Taphaw nga imbestigasyon

Human ireklamo sa usa ka mahuyang ang mga doktor ug nurses sa Vicente Sotto Memorial Medical Center nga nagbugal-bugal ug mihimong kataw-anan sa iyang operasyon ug mi-upload pa niini sa YouTube, miumol dayon og investigating panel ang kadagkoan sa nahisgutang tambalanan aron sutaon ang kalapasan nga nahimo sa mga gipangreklamo.

Ang resulta sa nahisgutang imbestigasyon gipagawas sa panel kaniadtong Biyernes sa buntag diin ilang girekomendar nga pasakaan og kasong administratiba ang tulo ka mga doctor ug usa ka nurse. Gipahimangnoan usab niini ang laing supervising doktors ug nurses nga sundon gayod ang standard operating procedure sa mga operasyon nga ilang ipahigayon. Girekomendar usab niini ang pagdili na sa mga student interns sa pagsuroy-suroy sa operating room sa tambalanan atol sa mga operasyon.

Ang nakaahak lang sa resulta sa imbestigasyon nga gipagawas kay wa itug-an niini sa katawhan kun si kinsa ang mga doktor nga ilang giimbestigahan kay mga abnormal. Wa gani kini magtuki sa mga kalapasan nga nahimo sa mga abnormal nga doktor ug nurses. Ang maong rekomendasyon di pa sad nila ikapatuman tungod kay ila pa kining isumeter ngadto sa Departamento sa Panglawas nga wa nato masayri kun mopatuman ba sa rekomendasyon. Sa laktod nga pagkasulti taphaw ug lipat-lipat lamang ngadto sa raklamante ug katawhan ang nahisgutang imbestigasyon nga gihimo sa kadagkoan sa Vicente Sotto nga tambalanan.

Ang gihimo sa mga doktor ug nurses sa Vicente Sotto Memorial Medical Center dili lamang kini usa ka ordinaryong bugal-bugal ngadto sa mahuyang nga wa nila respito-i ang pagkatawo. Bugal-bugal usab kini ngadto sa pangalan ni Don Vicente Sotto diin gihatag ang maong pasidungog aron mahandum ang mga kaayohan nga iyang gibilin sa katawhang Pilipinhon.

Ang gihimo sa mga doktor ug nurses sa nahisgutang tambalanan wa lamang magpakauwaw ngadto sa mahuyang nga ilang gibugal-bugalan. Nagpakauwaw usab kini sa medical profession dinhi sa Sugbo ug sa tibook nasud nga diin sila kabahin niini. Sa ilang gihimo dili diay angayang ikasakit ug iprotesta sa mga doktor ang linya sa salidang Desperate Housewife nga nagpaubos sa dignidad sa medical profession sa nasud.

Ang rekomendasyon sa panel nga pagpasaka og kasong administratiba sa tulo ka mga doktor ug usa ka nurse tungod sa pagka abnormal sa ilang profession, nakaguba na sa imahin sa medical profession sa nasud. Mao nga mapasaka man ang kaso batok kanila, masilutan man sila, masuspenso o matang-tang man sila sa serbisyo o matang-tangan sa ilang mga lisensiya, kining tanan dili igo nga makabangon sa kadaot nga ilang nahatag ngadto sa medical profession. Dili kini igo nga makapabarog sa nalukapang dungog sa atong medical profession sa kalibutanong komunidad.