Grabe mopahimulos

"Sir, good day. Daghan karon nga mga agency nga grabe mopahimulos sa guard nga ilang dawaton bisan walay lisensiya. Grabe sila mopahimulos sa ilang tawo. Gamay ra kaayo ang rate, tag P120 ang adlaw unya 12 hours pa gyod ang duty.' -- 0909-3974421  (Sent: 04:18:03 pm -- April 3, 2008)

* * *

Dili maayong pasagdan lang kanang mga security guard nga maka-duty bisan walay lisensiya. Labing maayo nga molihok ang proper authorities paghimog pakisusi kun kinsa ang mga guwardiya nga walay lisensiya.

Kanang bahin sa rate, tinuod nga ubos ra kaayo ang P120 nga suweldo matag adlaw. Maglisod ang usa ka security guard pagbuhi bisan sa iya rang kaugalingon nianang maong suweldo. Siyaro na man sab ang mga security agency kun dili sila makonsensiya!

* * *

"Good pm, Sir. Ni-text ko nimo agi og pagpahibalo nga gisakyan dayon sa ubang mga namaligyag  pagkaon ang pagmahal sa presyo sa bugas. Sobra ra ang ilang pagpaumento. Ang takos sa kan-on tag P7 man dayon bisan tag P30 pa ang kilo sa bugas. Dili man gyod sila maalkanse sa kan-on kay mo-times three pa man gani na kun ayohon og takos. Sobra ra ni kay morag gusto pod sila makaginansiya og tagaliog. Dako na nig epekto ngadto sa atong kaigsuonang kabos." -- 0909-3880455 (Sent: 03:28:54 pm -- April 3, 2008)

* * *

Husto ka sa imong obserbasyon, higalang texter. Basta dunay produkto nga mosaka ang presyo, mosaka pod ang uban. Ug kitang mga purdoy maoy maapektohan og maayo niini. Wala gyod tay mahimo; moduko nalang ug magpaawot. Kay kinsa bay maka-regulate sa presyo sa mga nanag-unang palaliton? Mao nga ... haskang paita ning kahimtanga!

* * *

"Good day, Bro. Moreklamo lang ko bahin sa traysikol diri sa Lapulapu City. Gikan sa Basak Tamiya gate kutob sa Deca Home sa Ibabao tag P8 man ang pangayoon sa driver. Duol ra man unta kaayo kana. Ako si Bro. Erwin, usa ka CFD." - 0926-3105147 (Sent: 08:34:20 pm -- April 3, 2008)

* * *

Dili kaayo ko suheto sa plitehan nianang maong rota, Bro. Ang ako lang ikasulti nga kun unsay nabutang sa taripa nga plitehan, kana maoy angay sundon. Kun dili sundon ang taripa, kana usa ka violation ug puyde kamong moreklamo bahin niana.

(Sumbong ug reklamo? Text sa 0910-8105522)