Niining bahina sa akong lindog, tugoti nga akong hatagan og dalan kining text sa usa ka bata nga nagpakita og talagsaong pagpa-kabana bisan sa kalinghod pa sa iyang salabotan. Gusto niyang ipaambit ang iyang mga ideya ug obserbasyon mahitungod sa mga tawong badlongon nga iyang nakita sa iyang palibot.
* * *
Ang iyang text nagkanayon: "Good day, Sir. Naa lang unta koy i-share ninyo. Kini bitaw'ng dalan gikan sa Balamban padulong sa Toledo, mingaw man unta ug malinawon. Ugaling lang kay kining driver sa dagkong mga trak ug bus kusog kaayong magpadagan. Maglumba pa gyod sila. Mangobertik. Okey lang unta kun dako ang dalan. Gamay ra man god ang dalan, Sir. Bata pa ra ba ko. Mahadlok na lang ta motabok. Dili ko taga diri. Taga Iligan ko. Wala gyod ko makakita og ingon niini sa Iligan. Sir, wala bay makabadlong nila?" -- 0920-7918270 (Sent: 09:15:07 pm -- March 2, 2008)
Hinaot unta nga makahinuklog sa mga hamtong nga nagpabadlong kining gipaambit sa usa ka bata. Bahin sa iyang pangutana kun wala bay makabadlong sa mga badlongon, ang tubag mao nga "Aduna'. May mga ahensiya sa atong kagamhanan nga gisaligan pagpitol sa badlongon ug abusadong mga driver. Hinaot nga makabasa sila ning lindog.
* * *
"Good day, Sir. Bahin sa moli-moli ug video karera sa Ermita ang akong sumbong. Unsaon man paghunong niining sugala nga hasta mga barangay tanod kusog man moduwa niini? Ang mga barangay opisyal nagpakabuta-bungol lang niining problemaha." -- 0906-7578569 (Sent: 09:45:20 pm -- March 2, 2008)
Atensiyon, mga barangay opisyal sa Ermita. Aksiyoni ninyo kining gireklamo sa atong texter nga ingon sa nahisagmuyo sa inyong performance! In fairness ninyo, andam sab kining lindog pagdawat sa inyong reaksiyon kalabot niini.
Sa laing bahin, nakamatikod ko nga dili kini ang unang higayon nga nakadawat kog reklamo mahitungod sa video karera ug moli-moli diha sa Ermita. Morag taudtaod na kining problemaha. Dili ta makabasol kun dunay mga tawo nga mahisagmuyo nganong nagpadayon kini hangtod karon luyo sa kamatuoran nga identified na kaayo ang mga responsable niini. Busa...aksiyon!
(Sumbong ug reklamo? Text sa 0910-8105522).