EDITORYAL - Higpit nga lagda

Daghan nang mga aksidenteng nahitabo diin motorsiklo ang nahilambigit. Daghan ang namatay, mas daghan pa ang naangol.

Tungod kay nagkadaghan na karon ang motorsiklo, makapaabot pa gyud kita’g dugang pang mga aksidente. Simbako lang. Kini tungod sa matang sa dinrayban sa pipila ka mga motorista.

Didto sa Vietnam diin mas daghang ang motorsiklo kay sa mga sakyanang upat ang ligid, diutay ra ang natala nga aksidente.

Kini gumikan kay adunay periodic seminar ang mga nagdrayeb og motorsiklo. Sumala pa ni Engr. Peter Jameson, Australian motorcycle transport expert, ang kagamhanan sa Vietnam kanunay magpahinumdom sa mga motorcyclist nga sundon kanunay ang mga lagda sa motorbikers safety  code.

Dako kaayo ang silot ngadto sa mga motorista nga nakahimog kalapasan sa traffic code, suma pa ni Engr. Peter Jameson. Ug ubay-ubay na ang nasilotan. Sundon ta kuno ni dinhi sa ato.