Wala gi-remit

“Good PM. Ireklamo nako ang akong agency kay ang among SSS wala gi-remit. Unsay among buhaton?” -- 0910-9707337 (05:29:53pm-- February 2, 2008)

Dili puydeng dili i-remit ni bisan kinsang employer ang SSS contribution ni bisan kinsang member. Sa akong nasayran, mahimong kasohan og estafa ang employer o kompaniya nga maghimo sa ingon ngadto sa ilang trabahante nga member sa SSS.

Ang angay mong buhaton mao nga i-refer ning imong problema ngadto sa buhatan sa SSS. Dad-a pagseguro ang imong SSS card ug ubang mga dokumento nga magmatuod nga ikaw member sa SSS ug gikuhaan ang imong suweldo alang sa SSS contribution nga wala i-remit sa imong employer. Buhata kini sa labing daling panahon.

* * *

“Good AM, Sir. Diha sa dalan Panganiban ug Colon naay nag-abang diha nga taga city hall. Tulo iyang tindahan nga way permit. DTI ra, xerox pa gyud. Unfair namo nga naggasto pag-renew unya siya wa.” -- 0916-7630812 (Sent: 09:45:47am--Jan. 31, 2008)

Ang rehistro sa DTI legal man bisan xerox ray gi-display basta dili peke ang original copy nga ilang gihuptan. Pero nagtuo ko nga kulang pa gihapon sa papeles ang maong tulo ka tindahan kun maoy atong basehan ang text sa reklamante.

Maayo unta nga masusi sa proper authorities ang maong mga tindahan aron pagsuta kun nakatuman ba gayod sila sa mga rekisitos sa pag-operate og tindahan.

* * *

“Good day, Sir. Naay dispatser diri sa A.C. Cortes, duol sa Mintever Drug. Nagpabaga sa nawong ang maong dispatser. Anha matulog duol sa usa ka bakery nga tupad ra pod sa botika. Samokan kaayo ang maong dispatser.”  -- 0906-6150896 (Sent:09:51:06 am-- January 31, 2008)

Atong sangpiton ang atensiyon sa nahingtungdan mga awtoridad sa pagsubay ning reklamo sa atong texter. Mas maayo tingali nga anam-anamon ninyog badlong kining mga dispatser nga naghatag og kahasol sa mga driver sa PUJ. Identified na kining mga tawhana busa nagtuo kong dili lisod ang pagsikop nila kun mao gyuy atong tuyo nga dili na sila makapasalir sa ilang tinonto.

(Sumbong ug reklamo? Text sa 0910-8105522)