EDITORYAL - Higayon sa mga dropout

Daghan ang mihangop sa gipasiugdahan sa Department of Education (DepEd) nga Accreditation and Equivalency Test diin gihatagan og kahigayonan sa pagpadagan sa ilang pag-eskuyla kadtong mga wala makahuman sa ilang kurso sa elementarya ug high school.

Ubay-ubay nang mga dropout nga nakapadayon sa ilang tinguha nga makaangkon og diploma sa high school ug kolehiyo -- bisan pa nga may edad na -- pinaagi niining programa sa DepEd.

Daghan kitang mga kaigsuonan nga nanga-undang sa pagtungha tungod sa daghang hinungdan. Usa niini mao ang pagka-walay interes sa pag-angkon og hataas nga edukasyon sa batan-on pa sila ug ang laing rason mao ang kabisi sa pagpangitag panginabuhian.

Karon ang DepEd mihatag kanila og higayon nga makapadayon sa ilang pagtungha ug pagkab-ot og hataas nga edukasyon pinaagi niining Accreditation and Equivalency Test.