Adunay ordinansahon si Konsehal Gerardo Carillo diin ang katuyoan niini mao ang pagpamenos sa kaso sa dengue dinhi sa dakbayan.
Ubos sa maong ordinansahon, kadtong mga tag-iya’g lote nga pinasagdan lang ug nahimo nang lublubanan sa lamok mahimong multahan.
Maayong plano kini ug kun madali ang pagpasar sa konseho labing maayo.
Kahinumdoman nga adtong panahon pa ni Marcos, ang tanang lote nga gipasagdan lang sa tag-iya gipalimpyohan sa ubang tawo ug gipatamnan og utanon.
Tungod niini nalimpyo ang mga kasilinganan. Nasulbad ang problema sa lamok ug naka-produce pa og pagkaon ang maong bakanteng mga lote.
Hinuon, napatunhay ang maong kasugoan kay Martial Law man adtong tungora ug ang tanan gipakurog man ni Marcos.