Nasugdan na sa kongreso ang ilang imbistigasyon sa pasangil nga naghitak ang pagpayuhot og mga sakyanan sa pwerto sa Sugbu. Atol sa unang hearing nga gihimo didto sa kaulohan gipatawag sa committee on good government ang mga opisyal sa Presidential Anti-Smuggling Group, ang ahensiya nga gitukod sa Malakanyang aron paggukod sa mga smugglers.
Sa sunod hearing nga gipaabot nga mahitabo sa Pebrero pa sunod tuig, ipatawag na sab nila ang mga opisyal sa Land Transportation Office ug Bureau of Customs aron manubag sa mga pangutana sa mga kongresista.
Pero karon palang, pasayloa nga nagduda na ko unsay tuyo gyud sa mga kongresista sa ilang congressional investigation. Nituo na unta ko nga seryoso sila sa kampanya pagsanta sa car smuggling, apan ang kasayuran nga akong nahipos gikan sa usa sa mga kasaligang tinubdan nagkanayon nga human sa hearing usa sa mga kongresista nga bokal kaayo batok sa smuggling ang nakit-ang nakig-uban sa usa ka gidudahang smuggler sa Sugbu.
Kun tinuod ang maong kasayuran nga akong nadawat, unsa man gyuy tuyo sa maong kongresista sa kanunay niyang pagpangugat batok sa smuggling? Pakitang tawo ba lang ang iyang gihimo aron ingnong nagpakabana siya? O gusto niyang tay-ogon ang mga smugglers aron makakuha og concession gikan nila?
Pasayloa nga pugngan ko lang una ang pangalan sa maong kongresista, apan naka-ila kaayo ta niya tungod sa “kunohay” daghan niyang advocacy. Ang susamang tinubdan mitug-an sab nga ang maong gidudahang smuggler nga uban ni kongresista didto sa Manila usa diay sa iyang mga financiers sa election.
Pastilan, kun tinuod ang maong kasayuran, kita ray gitunto niining uban natong mga opisyal.
* * *
Karong gabii, sugaton nato ang bag-ong tuig sa lain-laing paagi. Ang uban mosugat niini pinaagi sa pagsaba-saba, pabuto ug turotot. Ang tinuohan sa kadaghanan mao nga ang pagsaba-saba ug ang pagpabuto maoy pag-abog sa dimalas nga uban sa tuig nga natapos.
Sugdan sa uban ang tuig sa palihi pinaagi sa pagsul-ob og mga sinina nga dunay puntik-puntik nga lingin.
Paghalad og tanang klase sa prutas nga lingin ug ang pagyogyog og mga sensiyo karong tungang gabii.
Magdala kuno ni og swerte sa tibuok tuig. Pero usa ra gud, pila na man ni ka tuig natong gihimo? Nganong hangtud karon wa man gyuy asinso ang kadaghanan natong
mga Pilipino.
Dili kaha maayo nga inay mogasto ta sa way hinungdan nga palihi, mas atong dugangan ang atong kakugi ug panlimbasog? Niini sigurado ko nga bisan gamay duna gyud tay mapaabot nga asenso kay sa magsalig sa maayo kunohay natong palihi pagsugat sa bag-ong tuig.
Akong panghinaot sa mga magpalihi og pabuto nga dili malihi-an ang inyong tuig nga magkuwang ang inyong kuyamoy. Malipayong Bag-ong Tuig natong tanan!
* * *
fplanguido@yahoo.com