Sa sunod ugma magsugod na ang bag-ong tuig ug dili malikayang maghandom kita nga mohamogaway ang atong pagkabutang sa sunod nga tuig. Bisan pa siguro kadtong mga libodsuroy, ilabina kadtong mga rugby boy sa Colon, ang maghandum usab nga unta mausab ang ilang kahimtang ug nga moasenso ang ilang kinabuhi.
Matag tuig, lain na usab ang paghandom ni Juan de la Cruz alang sa maayong pagkabutang. Apan ang problema mao nga kulang gihapon siya sa paagi nga matuman kini gumikan lagi kasamtangang krisis sa nasud.
Hinuon naanad na kita niini. Sukad pa kaniadto wala pa gayud nato makab-ot ang tumang paglambo sa atong nasud. Ug nagpabilin gihapon kita nga usa sa labing kabos nga nasud sa kalibotan.
Apan wala man siguroy dautan nga maghandum kita og kaharuhay, ilabina niining panahon nga puno sa paglaum tungod kay nagsaulog kita sa pagkatawo sa atong manunubos. Ato na lamang ipangaliyupo sa kahitas-an nga unta tubagon ang atong mga pag-ampo aron sa ingon nga matuman ang atong mga paglaum alang sa hamugaway nga ugma.
Alang sa kadaghanan kanatong mga Pilipino, naanad na kita sa simple nga panginabuhi nunot sa kapobrehon sa atong nasud. Kini siguro ang hinungdan ngano nga hangtud karon, wala kita mawad-i sa paglaum nga ugma damlag mosidlak ra ang kahayag sa pag-asenso.
Bisan pa man kun pipila kanato ang molangyaw na lamang sa laing nasud sa pamasin nga didto nila makaplagan ang ilang suwerte, mayoridad gihapon ang mipili nga magpabilin ni sa Pilipinas. Mao kini sila, bisan pa sa ka gamay sa ilang kita dinhi sa nasud, ang wala pa mawad-i sa ilang pagsalig sa kapabilidad sa atong kagamhanan pagpalambo sa nagsangkiig natong ekonomiya.
Anaa ra makita sa paningkamot ang pag-asenso sa usa ka tawo. Kun wala kay bilib sa imong kaugalingon nga moasenso sa imong mga paningkamot, nan wala kay katungod nga mohandum alang sa imong maayong ugma.
Dili ba mismo ang Ginoo mipahimangno kanato sa kanunay paglihok aron usab Siya motabang? Kun magtinapulan kita sama ra nga atong giputol ang posible’ng maayong direksiyon sa atong kinabuhi. Ug kana nahisupak hinuon sa kamandoan sa kahitas-an.
Hinaut unta nga ang bag-ong tuig magdala kanato og kahigayonan nga ato nang makab-ot ang atong mga damgo. Ug kun inubanan usab sa paningkamot, basin diay nga ang tuig 2008 mao na ang panahon paghulma sa usa ka butang nga maoy makapausab sa dagan sa atong kinabuhi.
Hinuon ang kagamhanan mitagna nga ang tuig 2008 magdala og maayong dagan sa atong ekonomiya. Sa niaging semana, si Presidente Gloria Macapagal Arroyo miingon nga naglaum siya nga mas molambo pa ang ekonomiya sa sunod tuig nunot usab sa kusog nga pagtubo niini karong tuiga.
Ang panagna ni Presidente Arroyo nagsumikad usab sa gibanabanang pagtubo sa ekonomiya sa nasud og subra sa siyete porsiyento. Matud niya nga lig-on na ang pundasyon sa nasud nunot sa maayong dagan sa peso batok sa dolyar, pagsulbong sa stock market ug sa dakong bul-og sa investment gikan sa mga langyaw’ng kompanya nga misulod sa nasud.
Matud sa kagamhanan, ang ekonomiya sa nasud mitubo og 7.1 porsiyento sulod sa siyam ka bulan niining tuiga, ug kini maoy labing dako sulod sa 20 ka tuig. Maayo kini nga kalamboan nga angay natong hangpon.
Apan matud pa sa mga ekonomista, nanginahanglan ang nasud og pito ka tuig nga siyete porsiyento nga paglambo aron gayud mouswag na ang 40 porsiyento sa mga Pilipino kinsa nabuhi lamang sa duha ka dolyar o ubos pa matag adlaw.
Hinuon matud ni Presidente Arroyo nga sa sunod tuig, ang iyang administrasyon maningkamot pag-ayo paghakot og mga investment, pagpalambo sa sektor sa edukasyon ug inprastraktura, ug pagdala sa bag-ong teknolohiya ngadto sa mga probinsiya diin ang kinabag-an sa mga pobre nagpuyo.
* * *
Ipadala inyong reaksiyon sa yacilam@yahoo.com