Nag ong-ong karon sa hawanan sa ubos balay balauranan ug sa senado ang balaodnon nga nagmando ngadto sa media sa pagpatubag sa mga tawo nga nahimong subject sa balita. Ila kining gitawag og right to reply. Ubos niining maong balaodnon, ang media nga mapakyas sa paghatag og higayon sa mga nahimong subject sa balita nga makapaabot sa ilang habig silotan pinaagi sa pagpabayad o pagpabilanggo. Kining maong balaodnon kwinanggol ug resulta sa utok nga busloton?
Sa journalism ug broadcasting sigon sa akong nahibaw-an sa mga seminars nga akong natambongan “mortal sin” ang pagpagawas sa balita nga wa makuha ang pikas nga habig sa balita tungod kay gikonsiderar kini nga katunga lamang sa tinuod nga gustong masayran sa katawhan, gawas lamang kun magdumili o nagdumili o di gyud mohatag sa iyang habig ang nahimong sentro sa balita, tungod kay di man pod mahimo nga tagoon ang balita gumikan sa pagdumili sa subject niini sa pagtubag - waiver ang tawag nako niini. Busa wa na kinahanglana ang legislated right to reply. Kining maong sugyot nga balaudnon nagpakita lamang sa pagkaignoy sa nangamahan niining senador ug kongresista sa trabaho ug ethics sa media. Sa media diin ang kredibilidad maoy gipakadak-an nga puhonan gilikayan gayod niini nga mapasanginlan nga bias ug nabayaran. Ang kredibilidad sa media bililhon, gani mas bililhon pa kini sa iyang kagamitan, kay mag-unsa man ang mga kagamitan kun wa nay motuo niya. Ang media nga di na katuohan mabangkarota kay di na man mahalin ang iyang mga balita. Mao kini ang hinungdan kun nganong likayan gayod niini nga madudahan ug mapasanginlan siyang bias ug nabayran. Busa di gayod mahitabo nga imantala niini ang balita nga wa kuhaa ang habig sa pikas. Ug kun aduna may naghimo niini, dili ni sila mga lehitimo nga mga media practicioners kun dili mao ni sila ang gitawag namo nga mga “komedya” kay way mga media outlet.
Laing binuang niining maong right to reply nga balaudnon mao ang pagpahamtang og silot sama sa pagpabayad ug pagpabilanggo niadtong media nga napakyas sa pagkuha sa habig sa pikas nga habig sa balita. Kwinanggol ug binoang kini tungod kay ang media na hinoon ang pabayron ug bilanggoon tungod sa kapakyas sa sentro sa balita sa paghatag sa iyang habig .Sayod na kita nga lihay pa sa langgam nga manatad kining mga sentro sa balita sa mga tigbalita ilabi na kun maglisod sila sa pagtubag sa mga pasangil nga gibato kanila. Kasagaran sa ilang himoon mao ang dili pagtubag sa phone ang palusot nga wa pa maabot sa opisina o sa balay ug maski unsa na lang nga klase sa alibi. Unya sa ilang paglihay ang media dayon ang basulon nga kuno wa kuhaa ang ilang habig.
Sa mga nagduso niining maong balaodnon wa kahay buslot nang inyong utok?