Mga pantalan nga gipanag-iya sa mga pribadong tawo maoy sunod tutokan sa congressional inquiry sa Committee on Good Government.
Kini numan nasota ni Kongresista Antonio Cuenco nga adunay mga pribadong pantalan sa Sugbu nga nag-operate ug gikatahong anha ipangkanaog ang mga smuggled nga mga kargamento.
Adunay taho nga nadawat si Cuenco nga adunay oil smuggling sa usa ka pribadong pantalan sa San Fernando, samtang laing smuggling sa usa ka private wharf sa Mandaue.
Nasota ni Cuenco nga dili lamang sakyanan ang problema sa smuggling sa Bureau of Customs. Kini lang daan ang oil smuggling, dako na kining problema tungod kay samtang nagsige ang pagsaka sa presyo sa mga produktong petrolyo, sige usab diay ang pagpayuhot og lana sa usa ka pribadong dunggoanan.
Kining maong pantalan gikataho nga gidunggoan sa MV Great Faith. Kun nalimot kamo, ang MV Great Faith mao kadtong barko nga gikawat gikan sa Ouano wharf sa Mandaue apan didto nianang maong pantalan gikatahong giilisan og pintal.
Dili nato kini hunongan og expose hangtod magiyahan ang mga law enforcement agencies pagsuta sa matuod nga mga binuhatan nianang mga pribadong pantalan.
Apan hangtod karon, walay nangahas pagsulod sa maong pantalan sa south bisan unsa pa nga klaseng authority ang dad-on sa mosulod tungod kay ang tag-iya niini kusog kaayo maghingalan og mga politiko nga ipasiatab nilang ilang padrino.
* * *
CITOM. Mobalik na isip chairman sa City Traffic Operations and Management si kanhi LTFRB-7 regional director Rogelio “Jingjing” Osmeña human wala na ma-renew ang iyang appointment sa Malacañang.
Mas maayo hinuon! Kay ang Citom karon walay klaro nga manager.
Naa man unta na si Arnel Tancinco nga executive director pero hanap pa sa dies nga panas, walay klaro modumala sa Citom. Nagsige lang og yaka sa iyang opisina.
Tan-awa gud ninyo ang Cebu City, wala na maklaro og dumala ang trapiko.
Hapit dili na kita makakita og traffic enforcer nga modumala sa trapiko kay na-busy sa sige og panakop tungod sa target sa pamunoan sa Citom nga pirmeng manguna sa koleksiyon.
Wala may nakamaahoan si Tancinco pagdumala sa Citom kay kun naa pa, wala kitay madawat nga mga reklamo ug dili nato ma-obserbahan ang pirmeng panaghuot sa trapiko sa downtown ug uptown area, ug “visible” ang mga Citom sa mga lugar diin busy ang mga karsada sa kadaghan sa mga motorista.
Kapila na nato tikdoli ang estilo sa Citom karon nga wala na mo-focus sa pag-atiman sa trapiko kay giuna ang pagpangita og mga malapason sa balaod sa trapiko sama sa pagpangguroy sa mga sakyanan nga gi-parking daplin sa karsada ginamit ang pribadong towing firm ug ang pagpang-clamp diin ang Citom nakasapi pag-ayo.
Maayong pakungon ang mga ulo nilang Mayor Tomas Osmeña ug Tancinco nga pareho og panglantaw sa Citom, pulos pagpaburot sa panudlanan sa siyudad ang sulod sa utok bisan walay gikabaylo nga maayong serbisyo sa mga tawo.
Manghinaot kita nga sa pagbalik ni Jingjing, tutokan niya ang pagdestino og mga traffic enforcer sa mga karsada.
Ug maayong sugdan na niya paghimo og traffic masterplan tungod kay nahadlok nga maliwat na ang Metro Cebu sa Metro Manila nga ang kahuot sa trapiko pareho na kahuot sa purol ni lolo.
* * *
Nganong nakaingon ko nga walay gikabaylo nga maayong serbisyo sa mga tawo ang kasamtangang pamunoan karon?
Tan-awa kuno ninyo nang inyong barangay wala ba maghitak ang basura?
Paghingalan og karsada sa siyudad nga walay libaong?
Unsa man nga basic services ang ikapanghambog sa kasamtangang pamunoan karon?
Mismo ang koleksiyon sa basura gipasa na sa mga barangay sumala sa gimbut-an sa balaod. Apan pila ra gyuy resources sa mga barangay nato nga ato silang saligan pagpanghakot sa mga basura nga naglaundok sa daplin sa mga karsada?
Aduna kitay nindot nga balaod kalabot sa waste management pero maayo lang kita sa sugod tungod kay walay political will ang atong gobiyerno, ilabi na ang mga local government units nga maayong aduna untay dakong papel sa pagpatuman sa balaod.
* * *
TEXT. Aduna kitay nadawat nga mga text messages agi og reaksiyon sa nangagi natong tikdol:
“Samtang nangusog si Emok Rupinta pagbabag sa demolisyon sa B. Rodriguez tataw lang kaayo nga siya sab ang nagbabag sa speed sa demolisyon sa mga fish vendors kilid sa veco sa carbon nga halos trisikad di na kaagi” (09068789846).
“JOHN GUD PM. PWEDE BAKO MAG PA MEMBRO SA SSS NGA DIA MAN KO NAG WORK SA COMPANY DRI SA BULCAO..3 YEARS NAKO DRI HANGTOD KRN WLA GHAPON KO NILA ISULOD SA SSS” (09108466537).
Kun ang imong gipasabot, wala mag-remit sa SSS ang imong amo, nakalapas na kana siya sa SSS law. Ang empleyado nga ma-regular kinahanglang ipa-miyembro sa SSS, Philhealth ug Pag-ibig.
Ang imong kompaniya obligado nga mopa-miyembro nimo sa SSS, Philhealth ug Pag-ibig, ug subay sa balaod adunay share ang imong amo nga itugbang sa imong kontribusyon.
Mahimo ka nga moreklamo sa SSS kun magmagahi ang imong amo sa pagpa-miyembro nimo.
Alang sa inyong reaksiyon, text sa 0915-7817491.