Misangpot na g’yod ang dili maayong binuhatan sa usa ka huwes didto sa Gingoog City nga pagmolestiya sa empleyado sa iyang korte ug sa usa ka kawani sa Parole and Probation Office.
Mimando na ang Korte Suprema nga si RTC Judge Rexel Pacuribot taktakon sa katungdanan ug dili hatagan og binipisyo. Mamilegro pa gani nga si Pacuribot matangtangan sa iyang lisensya pagka abogado.
Wala malipay ang mga justices sa Korte Suprema sa gihimo ni Pacuribot nga pag-abuso sa duha ka babaye nga dili na lang nato ilhon. Grabeha, kun ang asawa pa kaha ni Pacuribot ang himoan sa maong abuso, unsa kahay iyang ikasulti?
Gisalikway sa labaw’ng hukmanan ang pamahayag ni Pacuribot nga ang reklamo batok kaniya gihimo lang kuno agi lang og panimalos kay estrikto siya sa iyang pagka huwes.
Mitoo ang Korte Suprema sa pamahayag sa duha ka babaye nga mireklamo batok sa huwes. Mao na nga kun huwes gani ta, motuman g’yod ta sa balaud kay aron makakuha kita og respito gikan sa publiko.
Unsaon nga bisan dinhi sa dakbayan sa Sugbu, duna may mga huwes nga pwerteng daghana og mga kaso. Unya namatud-an ra ba g’yod sa Supreme Court nga tinuod mao nga gisilotan kini sa lainlaing paagi.
Dili g’yod sila sama sa higala nako nga mga huwes – sila si RTC Judge Gabriel Ingles ug RTC Judge Geraldine Faith Econg — nga gidayeg ni bisan kinsa. Pananglit puti, aw puti g’yod ug kun itum, aw itum sab. Sa ato pa, ang ilang hukom tinuod g’yod.
Akong klarohon nga kadaghanan hinoon sa mga huwes dinhi sa Sugbu mga maayo g’yod, pipila ra ang dunay mga dili maayong rekord, ang uban wala na gani sa serbisyo.
Nakadungog usab ko kaniadto nga may huwes usab dinhi sa Sugbu nga grabe ka hilig sa mga babaye ug napasakaan man g’yod gani og kaso sa Korte Suprema. Dili na lang nako ilhon kay malooy ta.
May usa ka taas nga opisyal sa Kapitolyo kaniadto, pastilan, reklamo ang mga empleyadong babaye. Pasudlon lang sa iyang opisina, dayon panghagkan. Apan basi sa reklamo, mas grabe ang gihimo ni Pacuribot.
* * *
Kun pugson sa mga maestra nga ang mga tinun-an nila ilang pasalmoton sa Sinulog sa Kabataan sa Dakbayan, unya paapilon nila sa praktis atul sa oras nga tingklase, dili na hinoon sila makaapil sa maong kalihukan.
Matud ni Mayor Tomas R. Osmeña nga kun mahibaw-an niya nga ang mga tinun-an gipugos sa pagpasalmot sa praktis, unya atul sa tingklase, mausik ra hinuon ang ilang kahago.
Gimandoan ni Osmeña si Sinulog executive director Ricky Ballesteros nga susihon ang report nga dunay mga tinun-an sa Lahug ug Apas nga gipapraktis og Sinulog atul sa oras sa klase.
Kapoy na man god kaayo kun human sa klase mopraktis pa ang mga bata. Lagmit nga lawom na nga gabii sila mahuman og bansay-bansay. Inigka-ugma posible nga dili na sila makamata’g sayo.
Ang tumong sa mayor, husto baya usab, kay kun gamiton ang oras sa tingklase sa pagpraktis sa mga bata, dili na sila makaapil sa leksyon. Aw dili g’yod hinoon sila ma-zero sa score kay ang maestra nga nagtugot kanila pag-apil sa praktis mohatag man og daku nga grado.
Apan kun atul na sa mga examination nga dili sila ang nagdumala, sigurado ubos ang ilang makuha nga grado ug mao kini ang dili gusto sa mayor.