Sa walay daghang liko-liko kami modiretso sa pag-ingon nga mihatag kami’g sinserong pagyukbo ngadto ni PO1 Noriel Luage nga namatay sa kamot sa usa ka tulisan.
Si Luage napusilan patay tungod sa iyang kaisog ug ka matinud-anon sa pagtuman sa tahas nga gihatag kaniya isip usa ka polis.
Usa pa ka rookie cop kon bag-ong polis si Luage apan diha kaniya atong nakita ang matang sa tinugyanan sa balaod nga gikinahanglan sa atong katilingban.
Angay’ng panaminan ug sundon ang kamatinud-anon ni Luage sa serbisyo sa ubang sakop sa kapolisan, ilabi na niadtong mga bag-ohay pa sa serbisyo kinsa nagkupot pa sa ranggo nga Polis Officer One.
Manghinaut kami nga ang bayanihong kamatayon ni Luage nakahatag og inspirasyon ngadto sa iyang nahabilin nga mga kauban sa pagtuman sa ilang katungdanan sa dakong kaisog ug kamatinud-anon.