Demokrasya

Ang Pilipinas demokrasya ug republika diin ang gahum sa stado ug gobiyerno nagagikan sa katawhan. Ang republika matang kini sa demokrasya diin ang katawhan mopili og ilang representante nga maoy modala sa ilang tingog ngadto sa gobiyerno. Mao kini ang akong gituohan nga nakapadesperado ni Senador Antonio Trillanes IV nga nagsugnod kaniya sa pagbiya sa bista sa iyang kaso bisan kun wa pa kini mahoman ug dayong kontrolar sa ikaduhang andana sa Manila Peninsula Hotel kaniadtong miaging semana.

Si Antonio Trillanes IV senador na. Gipili siya sa sobra 11 milyones ka katawhan sa miaging Mayo 2007 nga piniliay bisan pa man sa iyang pagpangulo sa nadungog na nga Oakwood mutiny kaniadtong tuig 2003. Ang kagamhanan ni Ms.Arroyo ug ang iyang mga sipsip nga heneral nakugang ug dili makatuo sa pagkapili ni Antonio Trillanes isip senador sa nasud, kini gumikan kay wa siya makatarong sa pagpangampanya tungod kay wa siya tugoti nga makagawas sa silda nga giprisohan niya. Wa usab siya’y kuwarta ug nagsalig lang sa partido nga nagsabak kaniya ug sa mga miboluntaryo sa pagpangampanya sa iyang kandidatora. Apan bisan pa man kun na senador na si Trillanes wa siya tugoti nga makalingkod sa iyang lingkoranan sa senado. Gawas nga wa siya patambonga sa mga session sa senado gidid-an usab ang iyang mga staff nga makabisita niya aron mahikotar ang mga gikinahanglan sa iyang opisina ug katawhan nga nagbutang kaniya sa katungdanan.

Si Trillanes gipriso aron dili siya mosibat sa kasong iyang giatubang sa atong hukmanan ug dili tungod kay konbiktado na siya. Bisan kun sa mata sa tawo ug sa Ginoo sad-an, apan sa mata sa atong batakang balaod inosente pa si Trillanes. Busa dili angayang ihikaw kaniya ang paglingkod sa senado aron iyang madala didto ang krusada ug kausa nga gipaluyohan sa katawhan sa dihang gibutang siya nila sa katungdanan.

Ang pagkapili ni Trillanes isip senador way lama sa pagduda kun ikomparar sa pagkapili ni Ms. Arroyo. Gipili siya sa sobra 11 milyones ka katawhan sa nasud kun ikomparar sa sobra 10 milyones ka katawhan lamang nga mibutang ni Presidente Arroyo sa katungdanan. Ang pagbaliwala ug ang paghikaw kaniya sa pagtambong sa session sa senado usa ka pagpanamastamas sa milyones ka katawhan nga mipili kaniya aron maoy modala sa ilang tingog sa hawanan sa senado. Ang paghikaw ug pagdili ni Trillanes sa pagtambong sa session sa senado usa ka pagyatak ug paghikaw sa katungod sa katawhan nga marepresentahan ang ilang tingog sa atong gobiyerno ilabi na sa senado.

Si Trillanes senador na og imposible na kaayo nga iyang sibatan ang kaso nga iyang giatubang sa atong hukmanan. Busa angayan lamang siyang tugotan sa atong hukmanan nga makahimo sa iyang trabaho isip senador. Gidala na unta ni Senador Trillanes sa hawanan sa senado ang iyang kausa ug krusada kun gitugotan pa siya nga makatambong sa session sa senado, wa unta kini niya dad-a didto sa Peninsula Hotel sa Makati.