Drugas sa Tutay

Ayaw mo kahibulong kun nganong nagsige ko’g hisgot mahitungod sa gikatahong payuhot og ginadiling drugas sa Tutay, Pinamungajan, Cebu. Hangtod god karon nakadawat pa gihapon ko’g sumbong nga nagpadayon ang pagpayuhot og drugas sa maong dapit. Masabot nato nga morag wala pa gyud maaksiyoni ang maong kalihokan.

Gawas sa nahaunang mga sumbong nga akong nadawat, ania pa gyu’y laing mga reklamo nga gipadangat sa atong lindog. Tungod sa kadaghan sa mga reklamo nga atong nadawat, nagtuo ta nga posibleng duna gyo’y nahitabong pagpayuhot sa ginadiling drugas  diha sa Tutay, Pinamungajan. Ug kini angay susihon, una sa tanan, sa mas nasuheto sa maong dapit nga mao ang mga barangay opisyal.

“Good day, Sir. Please unsay among buhaton aron masumpo ang kusog kaayong payuhot og shabu diri sa brgy. Tutay, Pinamungajan. Naa pod sa ubang barangay sa Pinamungajan.” -- 0905-8621530 (Sent: 02:13:33pm--November 11, 2007)

Akong klarohon nga dili kini ang unang higayon nga nakadawat ta’g text nga ingon niini. Igo lang tang mihatag og pagtagad sa mga sumbong nga atong nadawat. Aron mahunong na ang mga reklamo, angayan gyud sumpoon sa hingpit ang pagpayuhot og ginadiling drugas diha sa Tutay, Pinamungajan. Labing maayo nga palihukon na sa mga barangay opisyal sa maong dapit ang ilang barangay intelligence aron pagsuta kun unsa kini ka tinuod ug aron pag-ila niadtong mga responsable sa paghimo niini -- ang pagpayuhot sa ginadiling drugas.

* * *

“Good day, Sir. Naa lang unta ko’y itaho nimo. Mahitungod kini sa usa ka drug pusher diri sa Proper San Vicente, Yati, Lilo-an. Dinhi dapit sa basketbolan ni siya. Wala man gyud nakasumbong ug nakapadakop niining mga tawhana sa mga polis. Ang akong anak usa sa natental nianang bisyoha.” -- 0919-4326073 (Sent: 11:42:44am--November 5, 2007)

Isumbong kana ninyo ngadto sa inyong mga barangay opisyal. Mahimo sab nga inyo kanang itaho ngadto sa kapolisan sa inyong lungsod. Kun gusto mong dili magpaila. Ipaagi lang sa sulat o text message.

 (Sumbong ug reklamo? Text sa 0910-8105522).