December 2, 2007 | 12:00am
Pagmata na moabot na siya! Pulong pa sa usa sa mga kinaham kong awit ning panahon sa Adbiyento. Kay unsa ba gud ang adbiyento? Ang adbiyento gikan sa linatin nga ADVENTUS nagkahulogan og Pag-Abot. Sa atong Kristohanong panlantaw, ang panahon sa Adbiyento mao ang higayon diin atong gihinumdoman ang Unang Pag-abot sa atong Ginoong Jesus diha sa iyang pagsulod sa tawhanong kasaysayan sa dihang siya nagpakatawo sama kanato. Ang ikaduhang Pag-abot mao pa gyud ang atong gipaabot. Kanus-a man kini mahitabo? Kana ang wala nato hisayri.
Mao nga kinahanglang kita magtukaw sa atong pagpaabot nga malaumon sa Ikaduhang Pag-anhi sa atong Ginoo diha sa Himaya. Mao nga ato kining pangandaman sa paaging maampoon ug mahinulsolon. Kay bililhon kaayo nga atong pasudlon ang atong Hari ug manunubos diha sa atong kasingkasing nga hininloan gikan sa mga gapos nga walay hinungdan nga bunga sa atong pagpakasala. Mao kini ang maayong ihalad ta kaniya sa iyang pagbalik, usa ka putli nga kasingkasing ug limpiyo nga kalag!
