Blasphemy

Gireklamo sa tulo ka mga obispo ang dakong tarpauline sa belen nga gibitay ni Mr. Vic Alvarez sa iyang sinehan diha sa may dalan Colon nga naghulagway ni Erap nga mao si Jose ug presidente Gloria Macapagal Arroyo nga mao si Birhen Maria. Blasphemy ang rason sa mga obispo sa ilang pagreklamo. Apan gipasabot ni Mr.Vic Alvarez ang mensahe sa maong belen. Matud pa, kahiusahan ug kalinaw sa nasud ang buot niining isangyaw ug ang pagpakigbatok sa kahiwian sa gobiyerno ilabi na sa issue sa graft and corruption.

Kung blasphemy ang ingon diay niining mga hulagway nganong karon man lang nagreklamo ang atong simbahang katoliko? Nganong wa man kini magreklamo sa daghan ug nagkatag nga mga posters kaniadto nga naghulagway sa atong Ginoong Hesukristo nga mura og si Michael Jordan nga nagduwa og basketball, nagpatsoy-tsoy nga nagsakay og motorsiklo ug nagmaniho sa usa ka sakyanang de pasaheroan. Dili ba blasphemy man usab kini?

Usa lang ka pagpadayag sa pagbati ang nahulma sa belen nga gibitay ni Mr. Alvarez sa iyang sinehan. Pagbati nga nangindahay og kalinaw ingon man kahiusahan sa matag usa nato dinhi sa nasud nga nagkatibulaag ug nagkabahin-bahin gumikan sa panagbangi sa interest ug sa politika. Suliran nga namugna gumikan sa kapakyas usab sa atong simbahan sa pagtudlo sa mga maayong values ngadto sa iyang mga sumusunod.

Way koy nakitang dautan sa gibitay ni Mr.Vic Alvarez nga belen diha sa iyang sinehan, gani maoy akong nakita niini ang pagkamatinud-anon sa iyang kasing-kasing nga nangandoy og kahiusahan ug kalinaw nga nahisama sa isdang labayan ka dangog nga dakpon. At least dili siya tigpakaaron-ingnon. Dili siya sama sa uban natong kaparian ug kadagkoan sa simbahan nga gikabay-an ang pulpito aron maabot ug makab-ot ang langit sa pagkadato o pagkaadunahan.

Kun blasphemy man ang gihimo ni Mr.Alvarez minor lamang kini kun ikomparar sa blasphemy nga nahimo sa pipila nato ka kaparian ug kadagkoan sa simbahan. Mas grabi pa nga blasphemy ang nahimo sa pipila nato ka kaparian ug kadagkoan sa simbahan kay sa gihimo ni Mr. Alvarez dihang ilang gigamit ang ngalan sa atong Ginoo ug ang pulpito aron mamahimo silang dato ug adunahan, butang nga inanay nga nakapahilayo sa ilang mga sumusunod sa pagsunod ug pagtoo sa mga pulong nga ilang gisangyaw.