EDITORYAL - Ang utok magpadayong luwas

Kun si Justice Secretary Raul Gonzalez ang pabut-on, iyang pabuhian ang nabiling 13 ka mga sundawo nga nakombikto sa kaso nga pagpatay kang Ninoy Aquino.

Si Gonzalez mihimo og pamahayag bahin sa mga pinirisong sundawo human pasayloa (pardoned) ni Presidente Arroyo ang usa sa mga kombiktado.

Matud ni Gongzalez, 25 ka tuig na nga natanggong ang maong mga sundawo kinsa miinsister nga wala silay sa’a sa kamatayon ni Ninoy.

Nakombikto tuod ang maong mga sundawo apan ang mastermind kon ang utok sa asasinasyon padayon nga luwas ug morag wa nay esperansa pa nga mahibaw-an.

Hinuon, ang katawhan hagbay rang nakahukom kun kinsa ang utok. Posible nga ang nakombikto nga sundawo wa tinuod masayud kun kinsa ang mastermind kay isip sundawo motuman ra man sila sa mando sa ilang kadagkuan.

Ang mga kombiktadong sundawo dili gyud makahatag og katin-awan bahin sa utok sa pagpatay kang Ninoy bisan madugta pa sila sa prisohan.