Gituyoktuyok mi

Kinsay tag-iya o operator sa Airland taxi nga may plate number GXB 866? Mohangyo lang ko sa operator sa maong taxi unit sa pagdisiplina sa driver niini nga sa akong tan-aw, kuwang og seminar. Mahimong tawgon siyang abusado o manglilingla? Puyde sab nga tawgon ang maong driver nga danghag.

Niadtong Oktubre 25 miadto ko sa Pardo aron pagduaw sa   usa ka higalang nagpuyo didto. Kauban nako ang akong misis. Sa among pagpauli, misakay mi sa Airland Taxi nga nagdala sa plate number GXB 866 ug giingnan nga magpahatod mi sa The Freeman. Giingnan ko pa gayod ang driver nga ang The Freeman nahimutang sa may eskina sa D. Jakosalem ug Manalili  Sts.

* * *

Misubay mi sa N. Bacalso Avenue lagbas sa P. del Rosario. Pag-abot namo sa eskina Junquera, wala siya mo-right turn. Gipasagdan ko lang siya kay mahimo man sab nga adto mi agi sa Sikatuna paingon sa Manalili. Tuod man, miliko siya sa dalan Sikatuna. Apan wala madugay, miliko mi sa laing kalye nga misangko sa D. Jakosalem. Kay one way traffic man ang D. Jakosalem gikan sa may Colon, dili mi maka-left turn didto. Gipangutana ko na ang driver kun asa mi niya dad-a kay iya na man ming gituyoktuyok. Gisumbalik ko niyag pangutana kun asa kuno mi. Gisinghagan ko siya sa pag-ingon nga sa The Freeman kay naglagot na ko. Patuyang lang siyag padagan sa taxi nga wala man diay siya makatuhog o makasabot kon asa niya dad-a kaming iyang mga pasahero. Tuod  man, nadako gyod ang among nabayran!

* * *

Nabuysit ko sa maong driver. Gawas nga nalangan mig diyotay sa among biyahe, nakabayad pa gyod mig dako sa plite kay iya man ming gituyoktuyok. Mahimong gituyo niya nga ituyoktuyok mi aron madako ang among maplite. Posible sab nga nagdinanghag gyod siya maong wala niya makuha ang akong instruksiyon nga sa The Freeman mi magpahatod bisan klaro kaayo ang akong pagdetalye kun hain mahimutang ang buhatan sa maong  pamantalaan.

Misalig ko sa kaligdong sa tag-iya sa Airland taxi. Hinaot unta nga maleksiyon ang driver sa iyang taxi unit nga nagdala sa plate number GXB 866 kay walay batasan ang maong driver. Mikangkang sa bayad namo nga iyang pinaspasan.

(Sumbong ug reklamo? Text sa 0910-8105522)