Bahin sa suweldo

Ang nagganit sa cellphone number 0910-7350345 mi-text nga nagkanayon: “Good day, Sir. Duna koy ipangutana nimo bahin sa akong trabaho. Nagsugod kog trabaho October 2005. Ang akong suweldo sa una P210 ang adlaw. Hangtod niabot og P218. Pagka Abril 2007 gisuweldohan ko og P233 ang adlaw, hangtod karon.” -- Sent: 08:55:46pm-- October 8, 20070

Kun nia ka sa Cebu nagtrabaho, wala mahasubay sa minimum ang imong suweldo kay P241 man ang minimum ron. Gani sa akong pagsulat niini, taudtaod nang gimando ang pagpatuman sa P9 nga usbaw sa suholan. Nga sa ato pa, P250 na unta. Ugaling kay nagdumili pagpatuman niini ang mga kompaniya kay alkanse (kuno) sila.

Kun gusto gyud kang mobarog sa imong katungod, nagkinahanglan kag sakripisyo. Gawas niini, mas maayong manghipos kag mga dokumento nga magmatuod nga P233 ray imong gidawat nga suweldo sa imong employer. I-refer ang imong reklamo ngadto sa NLRC. Atong tan-awon kun unsay ilang mahimo.

* * *

Nakadawat kog text gikan sa cellphone number 0928-3343082. Sumala sa kasayoran nga iyang gipadangat, naay pusher og shabu sa barangay 1 sa Tuburan. Angay ning susihon sa kapolisan kun unsa ka tinuod kining maong sumbong.

Labing maayo sab nga molihok ang mga opisyal sa barangay. Sila man ang labaw nga nasuheto sa ilang lugar, silay angay mosudlay sa tanang suok niini aron pagsuta kun tinuod ba ang gipadangat nga impormasyon sa atong texter o dili.

* * *

Sa laing bahin: “Good day. Naay transport company sa Lawaan, Talisay nga ang rate kay P140. Ang ubang kawani P110 ra. Naa nuon SSS. Pero sakto ba nang ilang sinuweldohan nga P110 ra ang minimum?”  -- 0910-9521578 (01:20:07pm--Oct. 8, 2007)

Klarong dili sakto ang P110 nga minimum wage kay P241 na man lagi karon ang minimum segun sa gilatid sa balaod. Grabe na man sab. Labaw man gyud sa katunga ang kulang sa suweldo nianang kalakiha! 

 (Sumbong ug reklamo? Text sa 0910-8105522).