Drama sa kinabuhi ni kanhi Pres. Estrada

Ang nagbansiwag nga talay sa mga pulong sa pamantalaan karong mga adlawa mao kining si kanhi Presidente Joseph Estrada  mihangyo kang Presidente Gloria Macapagal Arroyo nga kahatagan siya sa hingpit nga pagpasaylo human siya kahukmi nga sad-an sa iyang pagpangawkaw sa salapi sa lungsod sulod sa iyang pamuno-an. Kini ang gisulti sa iyang abogado nga si Jose Flaminiano pinaagi sa iyang sulat ngadto sa Presidente.

Sulod sa maong sulat kini nagkanayon: "Diha sa kinapungkayan sa nasudnong hilig, diin si Presidente Estrada sa kanunay lamang magtuman sa kaugalingon niyang hunahuna, magahangyo kami kanimo diha sa  imong kamahalan nga hatagan mo siya sa kagawasan ug hingpit nga pagpasaylo."

Si Acting Justice Secretary Agnes Devenadera mimatuod nga ang kagamhanan   nakadawat sa maong sulat, apan wa  niya ipadayag nga si Presidente Arroyo motugot ba sa hingpit sa maong pasaylo. Apan diha sa tabitabi sa mga tigmantala mahatagan kini sa maong pasaylo unya sa panahon sa pasko.

Daghan karon ang nangalipay, bisan pa sa mga kaatbang ni Estrada sa politika. Kana sa ngalan sa bahing tawhanon. Kay tiaw mo bay sa pipila ka adlaw human siya makadawat sa hukom nga sad-an sa iyang pagpangawkaw, nga bilanggoon siya hangtod sa iyang kamatayon, apan nagdumili siya sa hangyo sa iyang mga kaabin sa politika ug sa iyang manlalaban nga mangayo siya og pasaylo kang Presidente Arroyo. Kadto mao lamay pagpasabot nga amigo siya sa iyang katarungan ug ulipon sa iyang gusto. Salamat nga nahigmata na siya gikan sa lawom nga paghinanok.

Niining panahuna nga kapitoan (70) na ang iyang panuigon, nasigpatan na tingali niya nga hapit na siyang magpauraray sa bukton sa kamatayon. Nindot ang iyang hukom kay mao kiniy, paghulip sa kalauman niyang nahanaw.

Kay kita gipakatawo man aron mamatay diha unya sa iyang kamatayon hapsay ug tanos ang imong pagsubay sa dalan nga kinahanglan ni si bisan kinsang binuhat ning kalibutana bisan pa sa mga tawo nga nag-om-om nang daan og kutsara nga bulawan.

Salamat, daghang salamat Presidente Joseph Estrada sa drama sa kinabuhi nga imo ug among gipuy-an niining humalapit nga kalibutan.