EDITORYAL – Palig-onon ang Boy Scouting

Gibalita nga ang Boy Scouts movement sa nasud hatagan og bag-ong pagduso -- kon new push-- sa atong Department of Education.

Kombinsido ang mga kadagkuan sa DepEd nga ang Boy Scouting movement nakahatag ug makahatag pa gyud og dakong pag-abag sa pagpalambo sa tinguha sa eskuwelahan sa pagmolde sa kabatan-onan ngadto sa responsabling sakop sa katilingban.

Ang kadagkuan sa Boy Scouting naninguha sa pagdebelop sa mga bata ngadto sa pagkamaayong lungsoranon.

Ning panahon diin nagkadaghan na ang mga nahisalaag tang kabataan, ang paghatag og bag-ong kusog sa Boy Scouting movement maoy angay’ng buhaton sa atong kagamhanan.

Gikalipay namo nga ang DepEd nakahunahuna sa pag-revitalize kon paghatag og bag-ong kusog ug kalig-on sa Boy Scouting movement sa nasud.

Mas maayo sab unta kun ang matag barangay mo-organisar og ilang mga Boy Scouting troops diin ang mga sakop niini mga school dropouts.