Manghingiay

Sa siyudad, daghang mga tawo nga sipat kaayo. Bisan baskog ug dagko kaayog lawas, dili gustong magpaagas sa singot aron makakuwarta. Magpasayon lang. Manghingi o mangdelihinsiya sa mga tawo nga ilang ikabagat. Kahilas!

Usa ko sa ngil-aran kaayong magtan-aw nianang mga tawong tapolan ug manguwarta sa binugoy nga paagi. Nagpakauwaw man lang ning mga tawhana sa ilang kaugalingon. Kadagko nilag lawas unya magpakabuhi lang pinaagi sa pagpanghingi? Pwe!

Dili kay ako ray gingil-aran sa mga tawong tapolan nga magpakilimos bisan baskog kaayog lawas. Hasta pod ang mabuot nga lungsoranon misaway niining maong binuhatan sa mga badlongon sa katilingban. Kay tinuod man sab kining salawayon!

Usa ka magbabasa ning lindog mi-text nga nagkanayon: “Good day. Naa lang unta koy ireklamo. Diha sa dalan Manalili duol sa Carbon naay manghingiay diha. Usa ko sa gihingian nianang tawhana. Mangayo siya’g kuwarta. P20 ra ba gyud ang iyang pangayoan. Dako kaayog lawas ang maong lalaki, klaro kaayo nga adik. Hiwi siya og nawong. Siga kaayog mata. Mamugos gyud. Manghadlok pa.” -- 0921-8301827

Maayo unta kun mabadlong kining maong tawo sa mga barangay tanod. Dili maayong pasagdan lang siya nga magpadayon sa pagpasalir sa iyang modus operandi kay makahatag siya’g kahasol sa mga tawo nga mosum-ok diha sa Carbon area. Siya may nangdelihinsiya, siya pay manghadlok? Wala siya kuyapi? Kahilas god niana niya!

Maayo unta nga dunay mangahas pagbadlong nianang maong tawo nga gidudahang adik. Ayaw ninyo pasagdi nga magsamoksamok siya sa mabuot nga katawhan.

* **

Sa laing bahin: Good morning, Sir. Ako lang ipaabot ngadto sa Fuente Police nga hinaot unta nga ilang mabadlong kanang rugby boys diha sa may skywalk. Hasol kaayo sila kay anha ra modiskarga sa ilang hugaw sa may gate sa Elcado. Lain kaayo, uy.”  -- 0905- 8267065 (Sent: 10:44:11am--September 24, 2007)

Manghinaot tang mabasahan sa proper authorities kining imong reklamo ug mahipos na nila kanang rugby boys sa may skywalk sa Fuente nga dugay na kaayong gireklamo sa atong kaigsuonan. Aksiyoni na ni ninyo, uy!

* * *

(Sumbong ug reklamo? Text sa 0910-8105522).