October 4, 2007 | 12:00am
Gibiyaan ni Chairman Benjamin Abalos ang Commission on Election, 28 ka adlaw sa dili pa ang Barangay ug Sk election petsa 29 ning buwana. Usa ka dakong sakripisyo ni Abalos ang pagbiya sa Comelec aron dili kini madamay sa kontrobersiya nga iyang nalambigitan gumikan sa ZTE deal. Usa ka dalaygon ang gihimo ni Abalos tungod kay tagsa na lang sa atong mga opisyal ning panahona ang duna pay delikadeza. Kasagaran ugod sa atong mga opisyal sa gobiyerno magpapating ug murag tuko nga mihawid gayod pagmaayo sa opisina nga ilang gihuptan bisan og napuno na sa mga pasangil. Statesmanship ang gihimo ni Chairman Abalos. Manghinaot kita nga ang uban diha mosunod kaniya.
Apan tinuod kaha nga iya gayong kabubut-on ni Abalos ang pagbiya sa Commission on Election? Dili kaha pinugos kining iyang pagbiya? Wa lang kaha mapugos sa pagbiya si Abalos sa katungdanan tungod sa mandar sa tawo nga mas labaw pa kaniya og influencia?
Adunay mga pagduda karon ang pipila ka mga senador ug kongresista nga gipugos si Abalos sa Malakanyang sa pagpabiya sa Comelec aron dili na maduhig pa ang Presidente ug ang unang Ginoo. Apan hugot kining gipanghimakak sa Malakanyang.
Kun ugaling tinuod kining mga pagduda sa ubang Senador ug Kongresista, dili sakripisyo alang kang Abalos ang iyang gihimo kun dili sakripisyo kini para sa iyang padrino.
Usa ka adlaw sa wala pa sugdi sa Senado ang ilang imbestigasyon sa kontrobersiyal nga ZTE deal milupad si unang Ginoo Mike Arroyo paingon didto sa Hong Kong. Mibalik usab siya usa ka adlaw human mag-resign sa iyang katungdanan si Chairman Ben Abalos sa Commission on Election. What a coincidence! Timailhan kaha kini nga adunay kamatuoran ang pagduda sa uban nga adunay kamot ang Malakanyang sa pag-resign ni Abalos ug kini dinali-dali aron sa ingon makapauli na si First Gentleman?
