Duha ka historic nga panghitabo

Gikonbikto na si kanhi Pangulong Joseph Estrada sa iyang kasong plunder nga maoy nagdugang sa makasaysayanong panghitabo sa nasud nga naglambigit sa duha ka presidente sa matag tuig sa bulan sa Septiyembre.

Si kanhi Pangulong Estrada gikonbikto sa Sandiganbayan sa kasong plunder sa Septiyembre 12, 2007 ug ang pagpakanaug usab ni kanhi Presidente Ferdinand Marcos sa Presidential Decree 1081 kun Martial Law nahitabo niadtong Septiyembre 21, 1972.

Sa pagpakanaog sa maong hukom kang kanhi Pangulo Estrada nga nagkonbikto kaniya sa kaso maoy gikabalak-an ang pagmugna og kagubot sa iyang mga loyalista nga maoy hinungdan sa pagpangandam sa kapolisan alang sa pagpakgang niini.

Samtang lahi usab ang pagdeklarar sa Martial Law ni kanhi pangulo Marcos sanglit gitumong man alang sa pagpatigbabaw sa kalinaw niadtong panahona nga gihulga sa nagkalapad nga kagubot.

Nagkagrabe ang kaguliyang sa nasud niadtong panahona nga naglakip ang paglusad og nagkadaiyang protesta, pagpamomba ug pagpangambus sa kasundalohan nga mokalas og mga kinabuhi ug hangtod na pagpamomba sa Plaza Miranda Bombing nga mikalas sa daghang kinabuhi ug miangol sa iyang mga kontra sa politika.

Ang nagkalapad nga kagubot niadtong panahona maoy gibasehan ni kanhi Pangulong Marcos sa pagpakanaug sa balaod military  kon Martial Law ug gipangsikop ang mga politiko nga kaatbang sa iyang administrasyon.

Nagkalapad ang maong kaguliyang sa mga tawo nga mialsa batok sa iyang pamunoan gipangsikop usab ug gipangbalhog sa bilanggoan kauban sa mga politiko nga nahimong kritikal sa iyang pangagamhanan.

Human sa pagbalhog sa bilanggoan sa tanan nga mibatok sa iyang pamunoan maoy iyang gipatuman ang curfew hour nga nagdili sa mga tawo nga maglakaw sa gawas sa panimalay nga halawom na ang kagabhion.

Nagkadaiyang matang sa armas nga moboto nga walay lisensiya ang gitahan niadtong panahona ngadto sa mga awtoridad ug ang napakyas pagtahan gipangsikop ug gibilanggo.