Salamat, Camma

Bisan sa kalapoy sa lawas, nakamata ko sa kasaba sa akong alarm clock.  Alas  kuatro kinse na sa kaadlawon.  Lain na sab nga adlaw sa pagpanikaysikay ug bag-ong buntag na sab sa pag-atubang sa libuan ka mga suki sa pamahaw.  Luyo sa kakapoy sa lawas, kalami pang iligid-ligid sa higdaanan ug kanindot pang igakos sa akong tulo ka mga unlan, wala ko bisan kanus-a, magduha-duha sa pagbangon.  Nagkurog pa ko sa katugnaw sa hangin apan wala ni makapugong pagsulod sa banyo aron pagkaligo ug pagpangandam sa akong mga dad-unon alang sa lain na usab nga adlaw.

Sayong magsugod ang hagit sa adlaw tungod sa akong programa matag buntag.  Sulod sa kapin duha ka tuig, ingon ini na ang matang sa akong kinabuhi  Bisan kung kuwang pa ko sa tulog, nanakit pa akong kabukogan tungod sa layo nga biyahe sa miaging adlaw, bisan kung lami pang ipiyong sa akong mga mata aron pa-uyonan ang tinguha nga matulog pa og laing duha ka oras, walay bisag usa ka buntag nga nireklamo ko ug sipyaton ang labing mahinungdanong katungdanan nga gitugyan nako,  ang pag-atubang sa katawhan pinaagi sa telebisyon ug pag-abi-abi kanila sa usa ka Maayong Buntag Kapamilya.

Dili na maihap ang mga tawo nga nahimo namong bisita sa Maayong Buntag Kapamilya sulod sa kapin duha ka tuig sa kahanginan.  Gikan sa paghatag sa labing preskong balita ug paghatud sa labing mabulokong mga sugilanon alang sa panlawas, kultura, kabataan ug uban pa, walay adlaw nga gisumhan kaming tanan sa among gibuhat.  Bisan sa ginagmay nga lantugi likod sa camera ug mga kakuli-an sa technical nga usahay dili kalikayan, bisan sa mga ginagmay nga sipyat sa kahanginan, kining tanan nakahatag og ka lig-on sa mga tawo sa Maayong  Buntag Kapamilya sa pagpadayon sa pag-baid sa hibawo alang sa mas maayo ug hapsay nga programa sa sunod nga adlaw.

Alang nako, igo na nga may mga tawo nga mopadayag sa ilang pasalamat sa nahimong kontribusyon sa buntag nga programa sa ABS-CBN Central Visayas sa ilang adlaw.  Alang nako way sapayan ang kakapoy sa pagmata og sayo sa buntag kung magpabilin lang mi nga makatabang sa katawhan sa paghatag sa labing lab-as nga impormasyon ug pagpalapad sa ilang panlantaw ug katungod sa mga nagkadaiyang hagit sa kinabuhi. Kapoy man ang pagputol sa lami nga katulog matag buntag, apan walay sapayan ang tanan kung mabusog lang ang publiko sa mga impormasyon ug makahatag og pahiyom sa mga tawo sa dili pa sila mobiya sa ilang tagsa-tagsa ka panimay aron atubangon ang usa ka bug-at ug puno sa gimbuhaton nga adlaw.

Ang pasidungog nga gitunol sa Cebu Archdiocesan Mass Media Awards sa Maayong Buntag Kapamilya atol sa ika trese ka tuig nga pagsaludo sa grupo sa mga buhat sa media sa Sugbu, maoy usa ka nindot nga gasa ug premyo sa kahago matag buntag. Ang pagdayeg sa CAMMA sa MBK ubos sa “best talk show” nga kategoriya maoy labing haom nga paghatag og gibug-aton sa usa ka tulumanon nga walay laing tumong gawas ang pag-alagad sa mga kapamilya.  Usa ka dakong grasya ang maong pasidungog atol sa mga panahon nga nagpadayon ang pagsaka sa ratings sa MBK.

 Sa pagtaak sa MBK sa iyang ika tulo ka tuig sa kahanginan, walay laing saad ang programa gawas nga panindoton pa ni.  Gani karong buwana, gipangandaman na ang bag-ong nawong sa MBK gikan sa labing preskong segments hangtud sa labing bag-ong miyembro sa grupo nga modugang namo ni Vilma Andales.  Daw sa kagahapon lang dihang gisugdan ang maong pasundayag ug nag-usab-usab nalang ang akong kaparehas, apan walay paglubad ang tinguha sa paghatag sa labing preskong balita ug impormasyon.   Hangtud karon, daghan gihapon ang nangutana kung wala pa ba ko gikapoy sa pagmata og sayo ug pagsaba-saba na sa telebisyon sayo sa buntag.  Simple lang ang tubag, hangtud nga may mga tawo nga nalingaw, natabangan ug nahatagan og katagbawan sa matag sawo sa pamahaw, magpabilin ang usa ka Maayong Buntag Kapamilya.