Ignorante sa balaod

Husto kaayo ang lakang ni Konsehal Edgardo Labella nga ipadakop g’yod sa mga traffic enforcers ang mga drayber nga anha mohunong sa mga pedestrian lanes nga makababag na sa mga tawo nga molabang sa karsada.

Dugay na kaayo ko nga nagsigi og hisgot niining maong isyu kay usa ko nga mabiktima niining mga walay alamag nga mga drayber – sagad mga drayber sa mga passenger jeepneys.

Ang kadagkoan sa Citom giawhag ni Konsehal Labella nga mandoan ang ilang mga traffic enforcers nga ipatuman g’yod ang balaod ug dakpon kadtong mga moinsister nga anha mohunong sa pedestrian lanes.

Pastilan bitaw, daghan g’yong mga drayber nga wala makasabot kun nganong  dunay baga nga badlis sa karsada sa dili pa ang pedestrian lanes.

Ako na lang mong tug-anan. Gitumong kana aron anha ninyo ihunong ang pangunahang ligid sa inyong mga sakyanan. Kun inyo kanang himoon, ang bumper sa sakyanan dili g’yod mosaylo sa unang badlis sa pedestrian lanes.

Mahitabo g’yod nga mosaylo ang mga sakyanan sa maong linya kay unsaon, bisan og misiga na ang “Caution Light” diha sa traffic signal system, ang ubang drayber mopaturatoy ra man gihapon og dagan.

Unya, kun tan-aw nila nga maapeki sila og posibleng magkadam-ag sa laing sakyanan gikan sa pikas karsada kun mopadayon, mohunong na sila apan anaa na sa pedestrian lane.

Kinahanglan unta nga kadtong mga traffic enforcers nga maghinan-aw lang sa mga abusadong drayber, apilon sa pagpahamtang og silot. Mahimo nga taktakon sila sa trabaho.

Dili makiangayon, ang mga tawo nga molabang sa karsada kay nakalapas sa anti-jaywalking ordinance pangdakpon apan ang mga drayber nga mobabag sa agianan sa pedestrian lanes dili?

* * *

Pastilan, duna g’yod diay “insider” kon kakonsabo ang mga tulisan nga mibiktima sa mga kawani sa bangko nga mikuha sa kwarta nga halin sa La Nueva Supermart.

Na hala, pasakai na og mga kaso sa hukmanan aron nga kun makit-an, mahimong dakpon na sa kapolisan ug prisohon. Kana kun dili makit-an sa mga vigilantes. He he he!

Paita ning mga tawhana, gawas nga sayop nang daan ang gihimo nilang pagpanulis, gipatay pa nila ang gwardya. Kun isog pa lagi tong gwardya nga diha ra sa duol, mabawsan unta tong mga tulisan.

Unya, duna pa diay kuno’y polis nga diha sa MCWD building, tupad ra sa dapit nga nahitaboan sa tulis, apan ang maong polis wala maka-arte.

Kun tinuod man nga ang mga tulisan miikyas subay sa Magallanes paingon sa Plaza Independencia, mahimo unta kini nga mapusilan sa maong polis.

Tambag nako sa mga gwardya ug mga polis nga kun duna mo’y mga buto-buto nga madungog ayaw kaayo karatol para makahuna-huna mo og unsay tukmang buhaton.

* * *

Usban diay nako pag-awhag ang kadagkoan sa kapolisan nga nagsuperbisar karon sa mga security guard agencies nga paspasan nila sa pag-inspection ang mga gwardya.

Sutaa ninyo kay daghang mga gwardya nga gipagamit kanila sa ilang ahensya nga pwerteng batia. Mao na nga kuyawan g’yod ang mga gwardya nga mosukol kon dunay tulisan, labi na’g nindot og armas.

Sayonan ka og dili pa lang mobuto ang ilang armas? Ayaw mo pagluya-luya sa paghimo’g inspection kay human sa tulis sa La Nueva, may mga gwardya nga mitug-an nako nga bati kaayo ang ilang isyu.