Taliwala pa man sa ilang gihimong kasabotan paghunong na sa kaguliyang nga gikalambigitan sa ilang mga sakop, padayon gihapon ang gubot tali sa Alpha Kappa Rho ug Tau Gamma Phi sa Metro Cebu ug probinsiya sa Sugbu. Daghan gihapon sa mga krimen ang gikalambigitan sa maong duha ka grupo.
Mora’g nag-anad na kining duha ka grupo. Daghan ang nahasol ug napagan niining ilang panagbangi nga misangpot na sa ilang pagpinatyanay.
Maayo unta kun sila lamang ang maghinutdanay. Apan sa ilang mga kagubot daghan ang mga walay labot ang nadamay. Daghan intawon sa napagan sa ilang pagdinumtanay ang namatay, ug walay lain natong mabasol kondili kining duha ka grupo.
Ako mismo nawad-an na’g respito niining duha ka grupo tungod sa dakong puwerhisyong ilang gidala ngadto sa publiko. Kini gumikan sa walay kahumanan nilang gubot bisan pa man sa paningkamot sa otoridad paghusay kanila aron maundang na ang ilang panagbangi.
Mao nga ang tan-aw nako niining duha ka grupo wala nay kalainanan sa mga gang sa kadalanan. Nahisama na sila niining duha ka gang – Crips ug Bloods – nga naghatag lamang og labad sa ulo sa kapolisan tungod sa kanunay nilang engkuwentro nga naghatag og lama sa kalinaw sa Metro Cebu.
Dili uroy maulaw kining mga sakop sa Akrho ug Tau Gamma nga taliwala sa paningkamot sa otoridad pagpahig-uli sa ilang maayong relasyon, wala gayud mihunong kining ilang mga panag-engkwentro. Mga edukado pa man unta ang kadaghanan sa mga sakop niining duha ka grupo, apan ila lamang gisalikway ang panawagan sa otoridad alang sa kalinaw.
Usa ka peace covenant ang gipasiugdahan ni kanhi Cebu Provincial Police Office director Vicente Loot alang sa Akrho ug Tau Gamma pipila ka tuig na ang nakalabay. Gani, mismong si Cebu City Mayor Tomas Osmeña ug ang kagamhanan sa dakbayan sa Mandaue ang naningkamot usab kaniadto nga makabaton og kalinaw ang maong duha ka grupo.
Apan wala gayud mopatuo ang mga malditong sakop ning duha ka habig ug padayon gihapon ang ilang mga panag-away nga mora ba og dili na sila mahadlok nga mopatay og tawo.
Mitumaw na usab ang kagubot tali sa duha ka grupo atol sa kasaulogan sa anibersaryo sa Akrho sa niaging semana. Kini sa dihang gipangbato ug gipamusil kuno ang mga miyembro niini sa mga sakop sa Tau Gamma atol sa ilang motorkada didto sa barangay Camputhaw ug barangay Pardo.
Matud pa sa taho, mibalos dayon ang mga sakop sa Akrho atol sa maong insidente. Apan maayo na lamang kay walay naangol sa matag habig atol sa maong hitabo.
Ang maong insidente normal na nga mahitabo atol sa pagsaulog sa anibersaryo sa matag grupo. Kini gumikan lagi sa mga pasuya nga dili kalikayang magsugnod og mga kagubot tali kanila.
Gani sa nakalabay nga pagsaulog sa mga miyembro sa Akrho sa ilang anibersaryo, mga gara kaayo silang tan-awon nga mora og mga hari sa kadalanan nga nagwara-wara sa ilang mga kamot samtang nagpatong sa atop sa mga sakyanan. Matud sa kapolisan adunay mga paglapas sa lagda sa trapiko ang namugna sa mga sakop sa maong grupo niadtong tungora.
Kinahanglan nga idili na sa otoridad ang maong klase sa selebrasyon. Kini aron malikayan ang kaguliyang nga motumaw tungod lagi sa grabe’ng pagdinumtanay sa matag grupo.
Kun dili gayud moundang kining mga sakop sa Akrho ug Tau Gamma sa ilang panagribal, walay rason nga akong nakita ngano nga dili ideklara sa otoridad kining duha ka habig sama sa ordinaryong grupo sa mga kriminal.
* * *
Ipadala inyong reaksiyon sa yacilam@yahoo.com