Daghan na sa gatusan ka mga decorative lampposts nga gigastuan sa kagamhanan og minilyon ka pesos ang wa na gamita ug nagpadung na sa pagkaguba ug pagkainutil.
Wa na kining maong mga lampposts magsiga tungod kay giputol na sa Visayan Electric Co. ang koneksyon niini gumikan usab sa kapakyas sa DPWH sa pagbayad sa electric bills.
Karon gusto nang idonar sa DPWH ang pipila ka mga lamppost sa dakbayan sa Sugbu apan kadto rang dili daut maoy gustong dawaton sa siyudad.
Kontrobersyal ang pag-instalar niining mga lamppost atol sa Asean Summit gumikan sa kalambigitan niini sa giingong overpricing ug gani naa may daghang mga opisyal sa gobyerno, lakip na ang pipila nga anaa sa DPWH, ang nag-atubang og kaso sa Ombudsman.
Kun tinuod nga daghan sa mga lamppost ang nangadaut na ug ang uban gipangawat na, dili ikalalis nga nausik gyud ang dakong kantidad sa buhis sa katawhan.