Ipaubos karon sa security training seminar sa atong kapulisan ang mga huwes ug piskal agi og pagpangandam sa ilang kaugalingon gikan sa mga tawo nga naglaraw sa pagkuha sa ilang kinabuhi gumikan sa matang sa ilang trabaho. Mao kini ang pasiunang gihimo ni Chief Superintendent Silverio Alarcio Jr. hepe sa kapulisan dinhi sa rehiyon 7 nunot sa tingoha ni undersecretary Joselito Ruiz sa Department of Interior and Local Government nga pabutangan og mga close-in security ang mga huwes ug mga piskal gumikan sa kapeligro sa ilang trabaho. Si undersecretary Lito Ruiz misanong sa tinguhang mahatagan og close-in security ang mga huwes ug piskal gumikan sa kahadlok nga mao kini mosunod sa usa ka huwes sa Bayawan, Negros nga gipatay gumikan sa kasong drugas nga gihuptan niini.
Ang matag usa kanato may trabaho man o wala aduna gayoy risgo. Hinuon mas bug-at ang risgo nga gidala sa pipila kanato gumikan sa matang sa ilang trabaho busa kun aduna may pabantayan si Usec. Lito Ruiz dili lamang seguro ang atong mga huwes ug piskal kun dili ang tanan.
Ang laraw ni Ruiz nga pahatagan og close-in security ang atong mga huwes ug piskal impraktikal. Nagpakita lamang kini nga si Usec. Lito Ruiz wa masayod sa kahimtang sa iyang nataran. Dili ba suliran man sa atong kapulisan ang kakulang sa ilang gingsakpan? Gani kun aduna silay kapalpakan sa ilang trabaho mao man dayon kini ang pasanginlan sa kadagkoan sa kapulisan ang kakulang sa ilang personnel? Unya kuhaan na hinuon kini aron maoy mamahimong close-in security sa mga huwes ug piskal? Dili ikalimod nga ang atong kapulisan adunay giumol nga mga civilian nga gipaubos sa pagbansay-bansay alang sa pagbantay og mga VIPs pero tag 20 mil ka pesos matag buwan kun wa ko masayop ang bayad sa matag usa niini nila busa segurado gyud kong dili mokuha ang mga huwes ug piskal niini nila kay sa suweldo pa lang di na sila makaabot niini busa ang mahitabo, mga police ang pabantayon sa mga huwes ug piskal. Kun mahitabo man ugaling kini, mao na ni seguro ang higayon nga ang magbantay sa atong police precincts ug police stations sila na lamang si Chief Superintendent Silverio Alarcio Jr. ug Sr. Supt. Patrocinio Comendador kay ang ilang mga gingsakpan toa nagbantay sa mga huwes ug mga piskal tungod sa hukom ug kagustohan ni Undersecretary Joselito “Lito” Ruiz.
Angayan nga mahibaw-an ni Lito Ruiz nga dili lamang mga huwes ug piskal ang adunay hulga sa kinabuhi. Kitang tanan adunay hulga sa atong mga kinabuhi busa dili lamang sila ang nanginahanglan og protection gikan sa atong kapulisan kun dili kitang tanan.