Mamugos

Gikan sa cellphone number  0928-3111577: “Moreklamo ko bahin nianang mga manindahay sa mga terminal ug pier, kanang mga peddler ba. Mora man na silag mga ikog nga magsunodsunod. Mamugos aron palitan sa ilang baligya. Moingon dayon nga morespetar lang tag palit unya perte ra bang mahala sa mga baligya. Hasol kaayo sa mga pasahero. Okey lang kun maninda basta dili mamugos.” -- 0928-3111577 (June 12, 2007 -- 12:20:43pm)

Angay unta kitang mosabot kanila kay nanginabuhi man usab kana sila. Pero ang ilang estilo sa pagpamaligya ikasaway man usab nato kay wala man mahisubay sa hustong pamatasan. Ako mismo nakasinati og ingon niana. Hasol tinuod. Tiaw ba nga sunodsunoron ka bisan asa ka paingon aron lang gayod mopalit ka sa ilang baligya. Ila kang atang-atangan. Mao nga ang uban mapugos na lang pagpalit. Pero ako wala gyud mopalit, uy. Gisumbong nako sa guwardiya sa pier aron mabadlong.

Diskarte man god kana nila aron gyud mahalinan. Pero diskarte nga wala lagi mahimutang sa hustong lugar kay mamugos man ug wala mahisubay sa hustong pamatasan. Angay silang likayan sa mga pasahero.

* * *

Sa laing bahin: “Good day. Puyde ba mi mo-suggest nga magbutang og polis o tanod diri sa burger junction sa Basak, Lapulapu kay pirme man gyud ang tulis ngari. Pangnerbyuson lang mi. Ang tulis mahitabo alas 11 hangtod alas 4 sa kaadlawon. Dugay makaresponde ang mga polis. Mangamatay na lang ang mga biktima sa tulis kay mamusil man ang mga tulisan.” -- 0915-3393048 (June 12, 2007 -- 08:38:44am)

Lehitimo kining imong yangungo ug angay gayod kining hatagan og pagtagad. Hinaot unta nga ang kapolisan sa Lapulapu City makahatag og solusyon niining suliran sa tulis nga nagapanghitabo diha sa burger junction sa barangay Basak. Kun dili man mabutangan og polis, bentahan na lang kun dunay mga tanod nga magposte diha. Kuyaw alang sa kaigsuonan ang mamusil nga mga tulisan. Hinaot unta nga matagad kini sa proper authorities. Aksiyon dayon!

* * *

(Sumbong ug reklamo? Text sa 0910-8105522)