EDITORYAL - Ang anti-terror law

Gikagubtan karon ang implementasyon sa Human Security Act kun Anti-Terror Law nga napasar ubos sa pagpaninguha sa Malacañang.

Kun ang title kun ulohan lang sa maong balaod ang tan-awon, way problema. Makaayo sa nasud. Kay ang seguridad sa nasud ug mga lungsuranon mao may gitinguha nga kab-uton sa maong akta.

Apan daghan ang mga misupak niini tungod kay kuno ang mga lagda ug proseso nga ipatuman ubos sa maong akta kun balaod makadaut ug makabalda suma pa nila sa tawhanong katungod sa katawhan ilabi na sa mga kabus.

Wala pa kita makatuki og hingpit sa tanang probisyon nga gilatid sa kontrobersyal nga balaod apan tungod sa nagkadaghan nga namatok kun misupak niini angay tingali nga i-address kini sa kagamhanan sa labing madaling panahon.

Daghan ang mga tigpaniid nga nabalaka nga kun modaghan pa gyud ang mosupak sa maong balaod — ilabi na kadtong gikan sa mga militanteng pundok — basin mahitabo ang kagubot nga malisud nang pakgangon sa mga tinugyanan sa balod.