Ang presensiya sa upat ka dagkong tawo diha sa Kapitolyo nga nagdala sa bansagon nga Garcia –- Pabling, Pablo John, Byron ug Gobernador Gwendolyn Garcia  maoy gituohang hinungdan nga bugnaw’ng dawaton ni Kongresista Antonio Yapha ang iyang kaparotan human sa eleksiyon karong Lunes.
Tungod kini sa kontrol nga tataw’ng ipatuman sa mga Garcia diha sa Kapitolyo, ginamit ang linuog nga pagpatay ni kanhi Mayor Dokdok Illustrisimo sa Sta. Fe isip rason sa ipatuman nila kunohay’ng hugot nga security measures.
Kagahapon lang daan, si Byron nga igsuon sa gobernador, mipahibalo nga ilang limitahan ang mga mosaksi sa canvassing hangtod na sa proklamasyon.
Ang rason ni Byron nga basin unya og may kagubot nga mahitabo atol sa canvassing, nunot niining nahitabo ni Mayor Dokdok.
Tinuod nga walay laing haum nga lugar nga kahimoan sa canvassing gawas nianang social hall sa Kapitolyo.
Apan dili makabasol ang mga Garcia nga matanum sa publiko ang kahadlok nga may tikas nga mahitabo tungod kay kontrolado nila ang Kapitolyo.
Apan por delicadeza, maayo unta biyaan sa mga Garcia ang Kapitolyo, ilabi na ni Byron nga maoy giisip nga "siga" diha sa Kapitolyo aron paglikay sa mga akusasyon nga ilang kontrolahon ang dagan sa canvassing sulod sa Kapitolyo.
Awhag man lang ning ato, sa ngalan sa limpyo ug hapsay nga eleksiyon!
Tinuod dili lalim ang paggukod og mamumuno, ilabi na kun propesyonal na kini. Sumala pa sa nahaunang taho nga polis ang nagbira sa kanhi mayor ug makapila na masugo pagpatay og laing mga kandidato sa gawas sa Sugbu.
Apan hangtod kanus-a maibot ang tunok nga nagtaop sa kasingkasing sa mga Illustrisimo?
Kun nailhan na sa kapolisan ang mamumuno, sumala sa nahaunang pangangkon sa task force nga gitukod sa kapolisan nga maoy gitahasan pagsulbad sa kaso, unsa pa man ang langayan sa pagdakop sa mamumuno.
Sumala sa kapolisan, adunay mibarog nga testigo nga mitumbok sa usa ka AWOL nga polis nga maoy mipusil patay sa kanhi mayor sa gawas nga bahin sa Comelec.
Sa klaro lang, nagtuo gyud ko nga dali ra mailhan ang mamumuno ni Mayor Dokdok tungod lagi sa mga security camera nga gipakatap sa palibot sa compound sa Kapitolyo.
Apan wala ko makauyon sa akong nahibaw-ang wala gyuy natabang ang security camera sa pag-ila sa mamumuno ni Mayor Dokdok.
Ikaduha ra kini nga kapalpakan sa security camera nga gipamalit sa Kapitolyo. Una niini mao ang mga security cameras nga gipangtukod sa provincial jail sa Kalunasan. Wala magsilbe ang minilyon nga kantidad sa mga security cameras.
Pero bisan pa tingale og mailhan ang mamumuno tungod sa security camera sa Kapitolyo, dili gihapon maayong dayegon sila niini tungod kay ang labing maayong security measures mao ang paglikay nga may mga kagubot nga mahitabo sa sulod.
Ang labing nindot nga pangutana nga angayang tubagon ni Byron, kay siya man kaha ang consultant for security sa Kapitolyo, nganong nakalusot sa compound sa Kapitolyo nga nagdala og armas ang mamumuno ni Mayor Dokdok nga daghan man kaha diay’ng nakadestinong unipormadong mga polis, CSU, ug blue guards? Mag-unsa man nang daghang spy camera unya lugak ang security personnel?
Gibutyag ni Fire Marshal Ismael Codilla nga naglisud og palong sa kalayo ang mga bombero tungod kay naglisud sila og posisyon sa ilang kaugalingon.
Unang problema gyud, matud ni Codilla, ang kahagip-ot sa mga agianan nga dili kaagian sa mga trak sa bombero.
Ang kahagip-ot sa mga agianan dili na bag-o alang kanato. Ingon na gyud niini ang mga barangay sa siyudad sa Sugbu tungod sa nagkadako nga populasyon apan kulang ang mga pinuy-anan.
Usa unta sa nakitang sulbad niini ang fire hydrant nga ginama sa tubo nga magkonektar sa mga trak sa bombero gamit ang tubo paingon ngadto sa internal nga bahin sa usa ka sitio. Sa ingon, bisan pa sa kalayo sa karsada nga adto ra kutob makaparada ang mga trak sa bombero, ang tubig makasulod gihapon sa sudlonong bahin pinaagi sa pagpaagi sa dry hydrant og kutay sa mga hose.
Maayong tutokan sa kagamhanan sa dakbayan ang pagpatukod og daghan niini sa kabaranggayan human ning Lunes nga eleksiyon.