Husto si Tommy

Mosuporta g’yud ko sa baruganan ni Mayor Tomas Osmeña nga angay’ng wad-on na sa Comelec ang pagdili sa mga licensed firearm holders pagdala sa ilang armas panahon sa election period gawas lang kun makakuha sila’g gun ban exemption.

Tan-awa ang nahitabo ni mayoralty candidate Rogelio Illustrisimo Jr. nga gipatay mismo diha pa atubangan sa buhatan sa Comelec provincial office nga nahimutang sulod pa g’yod sa provincial Capitol compound.

Nakatabang ba ang Comelec nga dili mapatay si Illustrisimo? Samtang gidid-an sa Comelec ang mga tarong nga tawo nga makadala og armas, napatuman ba nila kini ngadto sa mga dautang tawo?

Anha ra tingali sila makaamgo sa sayop kun dunay dakung opisyal sa Comelec nga mabiktima niining mga tawo nga dili motahud sa ilang lagda.

Dugay man gud kaayo maaprobahan ang gun ban exemption kun wala g’yod kay suod nga mo-follow up didto sa Firearms and Security Committee.

Si mayor Osmeña gani nga miaplay sa wala pa magsugod ang election period nakadawat sa iyang kopya kaniadto rang miaging Lunes.

Ang ako hinoon napadali kay may kontak man ko didto sa committee. Apan bisan pa’g duna ko’y exemption, tapolan ko modala’g armas kay bug-at.

Aw sila nga akong mga kauban sa opisina, makakita man nga wala g’yod ko magluklok og armas. Dili man sab g’yod angay’ng ipanghambog ang armas.

* * *

Daghan ko og mga amigo nga dunay lisensyadong armas nga sama ni Tommy nagbagolbol. Kining mga tawhana dili barumbado nga magdala og armas.

Nagtinil sila og armas para lang "self defense" apan tungod sa gun ban, dili nila kini magamit. Kay ngano, kun dunay gun ban mapugngan pa nila ang mga politiko nga magtinil og goons?

Pikat ninyo. Ang tukmang buhaton sa Comelec mao ra nga awhagon ang kapolisan ug military nga ipaestrikto pagpatuman nga kadtong mga armas nga walay lisensya mao ray hugtan sa pagpanakop.

Wala ba ninyo mahuna-huna nga lima ka buwan ang election period unya usa ka tuig ra ang permit to carry firearms outside residence. Sa ato pa, pito ra ka buwan nga magamit sa usa ka gun holder ang iyang PTCFOR.

Kon inyong hikawan nga makadala og armas kadtong mga tawo nga dunay PTCFOR, balikan ba ninyo sila sa bali’g katunga sa gibayad nila alang sa PTCFOR ug lisensya sa armas?

Ang lagda sa Comelec mao nga bisan kadtong dunay lisensyadong armas dili makadala niini gikan niadtong Enero 14 hangtud sa Hunyo 13.

Pareho ang baruganan namo ni Tommy nga tungod sa maong lagda sa Comelec, sama ra kini nga gitudloan sa Comelec ang katawhan nga dili motahud sa balaod.

Ilabi na nga dunay gipatay diha g’yod atubangan sa Comelec, ang akong higala nga brodkaster nga kusog sab kaayo mangomentaryo sa usa ka politiko, miingon "unsa’y palabihon, madakpan o mapatay?"

* * *

Duol na lang g’yod kaayo ang adlaw sa eleksyon. Hala, kamong mga botante ayaw kalimti nga ang pilion ninyo mao g’yod kadtong mga kandidato nga dunay katakus.

Kun pagka mayor ug gobernador, kadtong makamao modumala sa iya unyang dakbayan o probinsya sama sa maayong manager.

Ang pagpili og konsehal, kongresista ug board member, siguroa kadtong mga kandidato nga maayong molantugi sa mga punto kon dunay balaudnon nga isugyot.

Isalikway ang mga politiko, ilabi na kadtong mga reelectionist nga dili magtingog atol sa sesyon. Kun maayo sila sa executive function, dili sila tukma nga magkonsehal.

Kinahanglang moaplay sila nga mahimong department nga direktang ubos sa pagdumala sa mga mayor ug gobernador.