Problema sa panarbaho

Gikan sa cellphone number -0918-71136xx: "Good day, Sir. Usa ko sa nagsunod kanunay sa imong column. Aduna koy bag-ong problema. Usa ko ka regular nga trabahante gikan sa 2004 hangtod sa December, 2006 nga wala pa ma-incorporate ang akong gitrabahoan. Pag 2007 sa January nakig-corporation ang akong employer ug ako gibalhin isip empleyado sa corporation. Akong pangutana kun magsugod na ba pud ko sa uno? Wala ba koy madawat nga separation pay sa akong gitrabahoan nga company? Kalit man lang gud nag-corporation. Ako nagsugod na og trabaho." -- January 14, 2007-20:55:22)

Daghang salamt sa imong text. Nagtuo kong magsugod ka sa uno, kana kun hatagan ka og separation pay sa imong kanhi kompaniya ug i-hire ka pag-usab. Aron imong maklaro ang tanan, labing maayong ikonsulta mo kini sa usa ka abogado. Puyde sab nga imo kining i-refer ngadto sa NLRC. May katungod ka sa pagpakisayod kun unsa gyud ang klarong probisyon sa balaod mahitungod niini ngalan nga usa ikaw ka trabahante. May katungod ka nga angay protektahan.

* * *

Sa laing bahin: "Hi...! Good evening. Naa unta koy ireklamo bahin sa video karera diha sa Purok Tambis, Umapad, Mandaue City. Maayo untang masakmit kana." -- 0919-4407776 (April 1, 2007--20:32:21)

Atong awhagon ang kapolisan sa dakbayan sa Mandaue sa paghimog pakisusi mahitungod niini. Labing maayo nga ma-counter check kini sa mga awtoridad aron masuta kun unsa kini ka tinuod. Dako ang akong pagtuo nga wala magtiaw ang atong texter ug nasuheto kaayo siya sa video karera operations sa maong lugar.

Sumala sa atong texter, ang operasyon sa video karera anaa sa Purok Tambis, Umapad, Mandaue City. Nagtuo kong dili maglisod ang kapolisan sa pagtultol sa maong dapit. Labing maayo nga siksikon nila ang maong lugar aron matultolan nila ang espisipikong lugar diin nag-operate ang video karera. Imposibleng dili nila matultolan kun ilang suhiron pag-ayo ang lugar. Manghinaot kita nga hatagan og gibug-aton sa kapolisan kining yanong sumbong sa usa ka texter.

(Sumbong ug reklamo? Text sa 0910-8105522)