EDITORYAL — Wa’y kahadlok sa kapolisan

Ang pagpusil patay kang Rogelio Illustrisimo Sr., kanhi Sta. Fe Mayor ug kandidato sa pagka-mayor sa maong lungsod niadtong miaging Miyerkules sa buntag mipakita sa pagka maisogon sa mamumuno.

Ang maong krimen gihimo mga alas 10:40 sa buntag mga duha lang ka dupa gikan sa pultahan sa buhatan sa provincial Comelec diha sa Capitol compound.

Daghan kaayong tawo sa maong dapit atol sa pagpamusil ug hayag kaayo kay maayo man ang panahon. Udto gud kadto.

Apan wa kini makahatag og pagduhaduha sa mamumuno sa pagtuman sa iyang tahas sa pagpatay kang Illustrisimo.

Ang maong dugoong hitabo mipakita nga ang kriminal walay respeto sa mga tinugyanan sa balaod. Ug wa mahadlok.

Kini tungod tingali kay daghan nang mga grabeng krimen ang nahitabo sa susamang sirkumstansya diin ang mga kriminal sayon rang nakaikyas.

Lain nasad ning leksyon alang sa atong kapolisan diin ilang ipakita ang dugang pa gyud nilang dedikasyon sa ilang trabaho aron karespetoan ug kahadlokan sila sa mga badlongong sakop sa atong katilingban.