Palit og botos imbestigaha!

Hugtanong gidili sa Omnibus Election Code ang pagpanghatag, pagtanyag ug kwarta o bisan unsang mahalong butang, pasalig og trabaho ngadto sa mga butante. Ang mga kandidato ug si bisan kinsa nga mohimo niini isip kabahin sa ilang pagpangampanya mamahimong kapasakaan og kaso ug posibling masilutan kon mamatud-ang sad-an.

Kini maoy rason nga si chairman Benjamin Abalos sa Commission on Elections mimando sa law department nga imbistigahon si Secretary Raul Gonzales sa Department of Justice tungod sa pagtanyag niini og ganti nga tag P10,000 matag opisyal sa barangay nga makahimo pagpadaog sa tanang kandidato sa team unity sa umaabot eleksiyon.

Si Abalos mimando nga imbistigahon si Gonzales tungod kay nakalapas siya sa Article 22, Section 261 sa Omnibus Election Code. Ang maong provision naglatid, " any person who gives, offers or promises money or anything of value, gives or promises any office or employment, franchise or grant, public or private, or makes or offers to make an expenditure, directly or indirectly, or cause an expenditure to be made to any person, association or corporation, entity, or community in order to induce anyone or the public in general to vote for or against any candidate or withhold his vote in the election, or to vote for or against any aspirant for the nomination or choice of a candidate in a convention could be held liable for vote buying and selling."

Ang mando ni Abalos gihimo bisan og way reklamo nga giduso didto sa ilang buhatan, timailhan ni nga ang Comelec dunay gahom nga mohimo og imbistigasyon sa ilang kaugalingong initiative nga wa kinahanglana ang reklamo.

Kon gihimo sa chairman sa Comelec ang maong lakang, way rason ang mga opisyal sa Comelec dinhi sa Sugbu nga di mokihol pag-imbistigar sa mga kandidato nga nakahimo og susamang kalapasan dinhi sa ato.

Di na angayang magpaabot ang mga opisyal sa Comelec dinhi sa dakbayan nga dunay reklamo nga iduso diha sa ilang buhatan aron imbistigahon ang paghaylo ni congressional aspirant Jonathan Guardo og P5,000 matag usa ka pamilya diha sa south district isip ilang puhonan kon kuno siya modaog sa umaabot eleksiyon tungd kay klaro ning kalapasan sa balaod.

Si Guardo gikutlo sa usa ka local nga mantalaan niadtong Sabado nga mihimo og saad ngadto sa mga pamilya diha sa south district nga iyang hatagan og puhonan kon siya modaug.

Ang maong saad, kon ang Omnibus Election Code maoy tamdan, klarong maisip nga pagpamalit og boto ang iyang gihimo busa angayan siyang imbistigahon ug pasakaan og kaso.

Di lang kay kini ang kalapasan niyang nahimo nga angayang tutukan sa Comelec. Ang dagkong mga billboards sa ilang grupo nga nilapas na sa gilatid nga gidak-on angayan sab nga aksiyonan sa Comelec.

[email protected]