Ang balaud naglatid nga ang mga dagkong tarpauline mamahimo lang ibutang diha sa headquarters sa kandidato. Ang mga malapason sa maong mga lagda dili lisod ilhon ug dakpon aron taralon sa hukmanan. Kini tungod kay imong makit-an diha sa kadalanan og kinsa kadtong mga kandidato nga wa mosunod niini. Bisan ang pagpamayad og mga butante di lisod bantayan kon motrabaho lang ang mga opisyal sa Comelec. Apan taliwa sa pagkamalapason sa ubang mga kandidato sa lagda wa maggunok ang mga opisyal sa Comelec aron sila gukdon ug patubagon sa pagka way respite sa balaud. Daling himoong tadtaran sa mga opisyal sa Comelec ang kakuwang kuno og mga tawo nga moreklamo sa mga kalapasan nga gihimo sa mga kandidato. Nganong di naman lang angkunon sa Comelec ang ilang kataspukan ug ka inutil pagtuman sa ilang gimbuhaton inay nga himoong rason ang kakuwang og reklamo aron himuon ang ilang trabaho. Kinahanglan pa ba ninyo nga dunay moreklamo bisan kamo mismo makakita og klarong mga kalapasan sa lagda sa eleksiyon? Buyno, aron molihok ang Comelec isipa nga usa ka reklamo kining akong lindog aron gukdon ang mga kandidatong malapason sa lagda.
Akong gihagit ang Comelec pagsusi sa dagko kaayong mga tarpauline sa mga kandidato sa grupo ni Jonathan Guardo nga sa akong tan-aw subra na sa gidak-on nga gitugot sa balaud. Aron pa gyud paghimong sayon sa trabaho sa Comelec, kay naanad man ni silag sayon nga trabaho, akong itultol ninyo og hain kini mahimutang aron di mo masaag ug pinangita niini. Una naa mahimutang sa Labangon, diha sa eskina Katipunan ug Salvador Extention. Ikaduha, naa sa Kalunasan, access road sa Opra paingon sa Lahug. Ikatulo, anaa sa Suba, Pasil ug Inayawan sa eskina F. Jaca.