Pipila hinuon sa mga kapitan nga nahinabi sa DYLA kagahapon miingon nga wa gyud silay namatikdan nga mga armado nga nagsuroy-suroy sa kabukiran. Sila si kapitan Yodi Sanchez ug Sergio Cesario sa Cambinucot miingon nga wa gyuy kagubot diha sa ilang barangay.
Si Kapitan Basilio Albores hinuon sa Sudlon II miingon nga niadtong miaging adlaw duha ka mga armadong tawo ang miduol sa pinuy-anan sa iyang lupon nga si Regino Bolo.
Wa hinuon nila maklaro kon mga goons ba og politico ang maong mga armadong tawo o mga rebelde nga naglihok sa kabukiran. Apan ang hepe sa kapolisan dinhi sa dakbayan nga si Patrocinio Comendador miingon nga wa sila kadawat sa maong report
Ipasusi hinuon ni Comendador kon unsa ka tinuod ang maong report aron mahimo sab nila ang gikinahanglang aksiyon pagtubag niini. Ang akong nahibugngan nganong wa may report ang mga sakop sa kapolisan nga tua sa kabukiran gidistino.
Matinuod man o dili ang maong report, way supak ang pipila ka mga kapitan nga akong nahinabi nga mapaubos sila sa Comelec control. Lakip si Kongresista Antonio Cuenco nga maoy higpit nga kaatbang sa lider sa GO nga si Jonathan Guardo wa say supak niini.
Matud ni Cuenco nga wa silay gitaguan og bisan unsay hukom sa Comelec andam silang motuman niini. Gihulagway hinuon ni Cuenco nga gibali ni Guardo ang sitwasyon tungod kay matud pa niya ang iyang kontra maoy nagpakatap og mga armadong tawo didto sa kabukiran.
Ambot og giunsa paghuna-huna ni Guardo, mura man hinuon og iyang gustong protehian ang mga armado nga iyang giingong nanghasi didto sa kabukiran. Di ko gustong motoo nga iya ning mga tawo, pero ang iyang lihok maoy nagtudlo sa katawhan nga gusto niya kining panalipdan.