Badlongong taxi driver

Hisgotan natog balik ang bahin sa badlongong mga taxi driver. Daghan man god akog nadawat nga reklamo batok niining maong mga driver. Naay mga driver nga manglubag ug dili mogamit og metro sa ilang pagpamasahero. Naay uban nga walay batasan ug walay respeto sa ilang pasahero.

Usa ka magbabasa ning lindog mi-text nga nagkanayon: "Good day. Usa ko sa tigbasahan sa imong mga lindog. Kining akong reklamo kabahin sa taxi nga akong gisakyan gikan sa Colon padulong ngadto sa Mandaue. Ang driver nagsigeg panigarilyo samtang nag-drive sa aircon nga taxi. Nakuha nako ang ngalan ug plate number sa taxi. Thanks." -- 0916-3616027 (January 6, 2007--20:12-02)

Nakuha man kaha nimo ang ngalan ug plate number sa taxi, labing maayo nga mopadangat kag reklamo ngadto sa tag-iya niini o ba kaha sa nahingtungdan ahensiya sa atong kagamhanan nga may hurisdiksyon sa pag-atiman sa mga kasong ingon niini.

* * *

Sa laing bahin: "Good day, Sir. Usa ako ka avid reader sa imong mga column. Mangutana lang ko kon policy ba sa mga taxi driver nga mag-standby sa mga motel nga P150 gyod ang ilang pangayoon basta gikan ka sa mga motel kon duol lang ang imong ulian? Kon medyo layo P200. Dili ba diay puyde nga meter ang gamiton kon gikan sa motel ang pasahero?" -- 0910-7899742 (Jan. 7, 2007-16:36:05)

* * *

Bisan asa pang dapita maggikan ang pasahero o bisan asa mamasahero ang taxi driver, angay gayod niyang gamiton ang metro sa iyang taxi. Kanang mga taxi driver nga mag-standby sa gawas sa mga motel nga P150 gyod ang pangayoon sa pasahero nga mosakay, dayag nga pagpanglubag kanang ilang gihimo.

Dili maayong i-tolerate ninyo kanang maong binuang sa maong mga driver. Dili diay kay ang mga taxi driver rang maghulat sa mga pasahero gikan sa barko maoy manglubag. Ang uban anha diay mag-atang sa gawas sa mga motel. Kuhaa ninyo ang ngalan sa taxi ingon man ang plate number. Labing maayo nga makuha usab ang ngalan sa driver aron sayon ra kining subayon. Isumbong kini ngadto sa LTO aron dili magpadayon kanang ilang tinonto.

(Sumbong ug reklamo? Text sa 0910-8105522).