Panggamit sa resources sa gobyerno

Gibasura sa Court of Appeals ang temporary restraining order nilang Mayor Thadeo Ouano sa Mandaue ug Mayor Arturo Radaza sa LapuLapu tungod sa kasong ilang giatubang sa Ombudsman nunot sa kontrobersiyal nga overpricing sa mga lamppost sa Asean summit.

Tayming usab kagahapon ang paggawas sa pamantalaan nga gibasura sa CA ang TRO nilang Mayor Teddy ug Mayor Boy ang pagpahibalo ni Jonkie Ouano atol sa 888 Forum sa Marco Polo Hotel nga nagkasabot ang ilang pamilya nga dawaton na lang ang suspension order.

Dili lalim ang masuspenso. Sakit kaayo sa dughan ang ingon niining panghitabo ug dili matukib sa mga baba ang kaligutgot ngadto sa ahensiya, ang Ombudsman, nga nagmando sa pagsuspenso.

Apan wala silay mahimo tungod kay nasud kita sa mga balaod ug ang paghari sa balaod maoy atong gisunod ug nahimong tipik sa atong lakaw sa matag karon ug unya.

Nakasabot kitang Mayor Teddy. Katapusang termino na niya karon ug nga wala gani gyud siyay plano pagpapili ni bisan unsang posisyon karong Mayo 14. Mahimo man unta siyang mag-kongresista o mag-bokal kun iyang gustohon.

Sakit alang kaniya ang iyang nahidangatan.

Makaayo hinuon alang kay Mayor Teddy ang pagdawat na lang sa kamatuoran nga dili na siya makapadayon sa iyang panerbisyo isip mayor sa Mandaue sa katapusang pila ka adlaw sa dili pa ang Hunyo 30 ang katapusan untang adlaw sa iyang pagka-mayor.

Bugtong katungod ni Mayor Teddy ang pagdangop sa korte paggakus sa bisan unsang "remedy" nga anaa sa balaod alang kaniya aron paglingkawas niining mga pagsulay nga iyang giatubang karon.

* * *

GAMIT. Uso kaayo karon paggamit sa mga kawani sa lokal nga kagamhanan alang sa kampanya sa usa ka kandidato.

Daghan na ang nakamatikod niini apan wala gyuy nakareklamo.

Tungod tingale kay wala usab masayod ang mga tawo nga gidili kini sa regulasyon sa Civil Service.

Bisan wala ang regulasyon nga nagdili niini, tataw man nga dautan, dili makiangayon ug pagpanikas ang paggamit sa mga kawani ug resources sa gobyerno alang sa pagpangampanya.

Luoy kaayo ang kontra nga wala sa gobyerno tungod kay mangabuslot intawon ang bulsa sa paggasto sa mga panginahanglanon aron mapakusgan ang kampanya.

Pila na ka eleksiyon ang akong nakoberan sukad ko naabot sa industriya sa media, apan balikbalik nga talan-awon ang paggamit sa mga sakyanan sa gobyerno nga may red plate pa alang sa kampanya sa mga incumbent.

Busa, maayong mopagawas og sirkular ang Civil Service Commission aron ipaklaro nila nga gidili kini sumala sa regulasyon.

Sa akong nahibaw-an, kinahanglan gyud nga mo-resign sa katungdanan ang usa ka kawani sa gobyerno kun ugaling buot niyang motabang sa kampanya pabor o batok sa usa ka kandidato.

Resignation ug dili lamang "leave" ang gikinahanglang isumiter.

* * *

NASYONAL. Dili lamang sa lokal nga eleksiyon nato makit-an ang pagpanggamit og mga empleyado sa gobyerno, sakyanan ug kagamitan sa gobyerno, kun dili gihimo usab kini sa mga kandidato sa nasyonal nga posisyon sama sa senador, bise presidente ug presidente.

Si Engr. Jun Ducat mi-hostage sa mga bata sulod sa usa ka bus didto sa Manila ug iyang gipadayag ang iyang kaligutgot ngadto sa nasyonal nga kagamhanan nganong hangtod karon aduna gihapoy minilyon ka pamilya nga nag-ilaid sa kalisud, samtang ang matag kandidato pagka-kongresista o senador mogasto og P30 ngadto sa P50 milyones sa kampanya.

Bisan ako makapangutana asa man kining kantidara kuhaon sa politiko?

Simple ra kaayo ang pagtinamban. Mao bitaw nga wala gyuy kalambuan ang atong nasud tungod kay ang salapi nga alang unta sa maong katuyoan kawaton na lang sa politiko aron mabawi ang minilyon nilang nagasto atol sa ilang kampanya.

Nabaniog sa tibuok nasud ug sa ubang parte sa kalibutan ang sitwasyon sa Manila sa dihang nang-hostage si Engr. Ducat sa mga pupil sa day care center nga iyang gidumala ug wala siya makalikay sa pagsaway nga may "kato-kato" ang iyang utok sa paghimo sa ingon.

Apan mas mohingalan ko og buang niadtong dili motuo sa iyang gipanulti nga minilyon ka pamilya ang naglisud tungod sa pagpangawat sa gobyerno.

Sa text message pa, unsay kalahian sa snatcher ug sa politiko? Ang snatcher mangawat una modagan, samtang ang politiko modagan una mangawat.