PE short sa student

Gikan sa cellphone number 0927-5411855: "Good day, Sir. Bahin sa school sa akong anak diri sa Mandaue-Mactan. Gidali-dali mi pagpabayad sa PE short pero hangtod karon wala pa gihapon kay gikaso pa kuno. Wala sab mo-refund ang teacher nga among gibayran. Thanks and more power." -- February 22, 2007--10:38:09

Unsa man kunoy hinungdan nga gikaso pa man? Unsa man nga matang sa kaso? Dili kaha kini minao-mao sa teacher nga maoy inyong gibayran sa kantidad sa PE short sa inyong mga anak nga estudyante? Nakasimhot kog binuang niining kalakiha!

Labing maayo nga mangayo mog katin-awan gikan sa maong magtutudlo aron atong maanalisar kun balido ba ang iyang katarongan kun nganong nalangay ang pagpanghatag sa PE short sa mga estudyante. Daghan ra bang mga magtutudlo nga kusog kaayong mopahimulos sa mga estudyante, sa walay paghunahuna nga nagkalisod ang mga ginikanan sa maong mga tinun-an sa pagpangita og kuwarta.

Paghiusa mong mga ginikanan. Ireklamo ninyo ang maong magtutudlo ngadto sa iyang labaw kun dili siya makahatag ninyo og balidong rason. Kun dili magpakabana ang labaw sa maong magtutudlo sa pagtawag sa iyang atensiyon, mahimong atong dak-on kining maong isyu. Kun mangusog gyud mo, makahimo kamo sa pagkonsulta sa usa ka abogado aron pagsuta kun unsay kaso nga mahimo ninyong ipasaka batok sa maong magtutudlo. Pero manghinaot lang ta nga dili na mosangko sa ingon niini ang tanan. Maayo unta nga madala ra sa sabot-sabot kay hasol na ang kaso.

* * *

Mga suki, adunay modus operandi karon nga anha mahitabo sa mga kan-anan sa mga mall. Ang estilo, kun ikaw naglingkod sulod sa usa ka kan-anan, adunay lalaki o babaye nga mokalit lang og duol nimo ug mopresentar og papel. Adunay nahisulat sa papel. Mangayo diay og donasyon. Pero kuno sa welfare sa kabataan.

Adunay letterhead pero walay ibutang nga address sa ubos sa ngalan sa ilang organisasyon. Sa dili pa mo mohatag og donasyon, susiha kun rehistrado ba ang ilang kapunongan. Pangayoig resibo aron pagseguro. Kun walay ikahatag, labing maayo nga dili na lang usab kamo mohinabang aron dili kamo mailad.

(Sumbong ug reklamo? Text sa 0910-8105522)