EDITORYAL - Plano ra hangtud karon

Ingon sa balita nga nabalaka ang mga drayber sa Punta Princesa nga makulban sa kaldero sa higayon nga mapatuman unya ang planong Mass Transit System (MTS).

Tinuod kini. Kun maimplementar ang MTS makulban gayud sila sa kaldero.

Apan ---usbon ta: apan-- kanus-a pa kaha mapatuman ang maong plano? Mangahanaw nalang kining nabalakang mga drayber, lakip na kitang mga sumasakay, wa pay katumanan nga mahitabo ang gikabalak-ang plano.

Daghan nang katuigan diin gisugdan ang paghisgut-hisgot bahin sa MTS apan hangtud karon nagpabilin pa kining plano.

Busa dili angay'ng mabalaka ang atong mga drayber bahin sa giingong MTS. Sa tinuoray lang, daghan usab ang nagpaabot sa katumanan niini apan sa pagkakaron wa pay senyal nga matuman kini.