Pamalandong ni Ouano

Si Mandaue City Mayor Teddy Ouano, inay manghudlat pagpamunal sa mahalong decorative lampposts sa iyang nataran ug pagkiha og libelo sa tanang nilambigit niya sa transaksiyon, angayng mokalma, mopugong sa nag-alintabo niyang kasuko, mopadaplin una sa iyang dakong kahadlok sa nag-ung-ong niyang pagkasuspenso ug posibleng pagkabilanggo ug, isip yukbo sa Semana Santa sunod semana, mamalandong nganong nahitumpawak siya sa kaalaotan:

* Napasakaan siya og kaso tungod sa iyang pagpirma sa program of works and estimates (POWE) sa deco lamps nga gigamit sa niaging 12th Asean Summit, di tungod sa paghingan ni Crisologo Saavedra niya ug sa iyang umagad nga si Cheryl ug di tungod kay ginganlan siya nga kawatan ni Cebu City Mayor Tomas Osmeña;

* Kon tinuod nga giwiris-wirisan lang sa Department of Public Works and Highways (DPWH) ang POWE, ngano man intawon nga, sa ngan sa tanang anghel sa kalangitan, nipirma man siya?; ug

* Nganong hangtod karon nagdumili man siya pagpakita sa publiko sa POWE nga iyang gipirmahan, tungod ba kay wa pa siyang kahibawo unsaon pagpasabot sa findings sa graft investigators sa Visayas Ombudsman nga ang iyang gibanabana nga mga numero milagrusong nitakdo hangtod sa kataposang usa ka dako sa tanyag sa kontraktor nga nakadaog sa subasta?

* * *

Inay mamanghag nilang Osmeña, Saavedra ug mga sakop sa media, di kaha maayo nga imbestigahon ni Ouano silang Mandaue City Engineer Hidelisa Latonio, City Administrator Serafin Blanco ug kaubanan diing kahoya nila kutloa ang mga numero nga ilang gibutang sa POWE? Naghimo ba sila og tinarung nga canvass sa suppliers sa deco lamps? O igo lang nitan-aw sa ilang mga kuko human nangawot sa ilang mga ulo? O may sukaranan ang pagduda sa mga imbestigador nga kakonsabo sila sa kontraktor, ang Fabmik Construction and Equipment Co., nga gipasanginlang mao ra say naghimo sa POWE nga gipirmahan ni Ouano?

Apan makatarung lang pag-imbestigar si Ouano sa iyang mga sakop kon tinuod nga ang bugtong niyang kalambigitan sa transaksiyon mao ra ang pagpirma sa POWE? Apan may duha ka makahasol nga tilimad-on nga mas dako ang papel sa mayor ug sa iyang paboritong umagad ning nangalisbong transaksiyon:

* Si Cheryl Ouano, nga samtang gitawag og "Iron Lady" sa Mandaue City Hall, kay ang tanang dagkong transaksiyon gikatahong nagkinahanglan una sa iyang bendisyon, way klarong katungdanan sa organizing committee sa summit niadtong Enero, maoy labing unang nakapahibawo sa media sa plano sa mga tigpasiugda pagbutang og deco lamps sa kinatibuk-ang ruta sa summit; ug

* Si Cheryl gitumbok ni Atty. Romy Fuentes sa Fabmik nga nitambong sa tigom sa DPWH uban sa mga kontraktor nga nitanyag sa pagsuplay sa multi-milyones pesos nga balor sa gikahadlokang labing mahalong mga suga sa tibuok kalibotan.

* * *

Email: [email protected]