Pakanaogon ang pasahero

Ubay-ubay na kog nadawat nga reklamo gikan sa mga pasahero nga naggikan ug mopaingon sa Cordova. Wala lang nako kini hatagig pagtagad sa una kay ingon sa walay klaro ang detalye nga gihatag sa mga reklamante. Hangtod nga nakadawat kog usa ka text nga morag klaro-klaro nag diyotay, mihukom kong tukion na kini.

Ang text nagkanayon: "Good day, Sir. Usa ko sa gatosan ka pasahero dinhi sa Cordova, Cebu nga nagreklamo mahitungod sa paagi sa ilang terminal diri nga makahasol sa mga pasahero. Kun gikan ka sa Poblacion pakanaogon man ang pasahero ngadto sa unahan unya ibalhin na pod og laing sakyanan. Nganong dili man idiretso? Naa pay lain diri nga among ireklamo. Ang ubang mga driver diri makainom mo-drive. Among gisuwayan og reklamo diri pero walay aksiyon." -- 0928-4284727 (January 29, 2007--08:02:51)

Mangayo tag katin-awan sa mga opisyal diha sa Cordova kun unsay hinungdan nga ingon man niini ang sistema. Makahasol man kini sa mga pasahero. Angay unta nga hatagan natog convenience ang mga pasahero pero niining maong kalaki, kahasol ang masinati sa mga pasahero tungod kay magbalhin-balhin man silag sakay.

Hinuon, kun dunay ordinansa ang LGU Cordova nga maoy gibasehan sa pagpatuman niining maong sistema, wala kitay mahimo niana. Pero kun walay ordinansa nga gibasehan niini, mas maayo tingali nga usbon kining maong sistema aron paghatag og convenience ngadto sa mga pasahero. Mabanabana lang nako ang kahasol nga masinati sa mga pasahero ilabi na gayod kun aduna silay dalang mga bagahe o kargamento.

Maayo unta kun adunay taga Cordova nga makabasa niining lindog ug makahatag kanatog katin-awan kun nganong ingon man niini ang sistema sa pamasada diha sa maong lungsod. Sa traysikol ra ba kini? O sa mga multicab? Unsa man? Ang mga commuter nga Cordovanhon nagkinahanglan og katin-awan bahin niini.

Bahin nianang mga driver nga mo-drive bisan nakainom og ilimnong makahubog, angay gayod kanang aksiyonan. Angay dakpon kanang maong driver. Dili maayong tugotan siyang mo-drive og sakyanang de pasahero kun makainom kay kuyaw kaayo kun madisgrasya ug maamong ang iyang mga pasahero.

(Sumbong ug reklamo? Text sa 0910-8105522)