EDITORYAL – Ang ‘election plugs’ sa KBP

Gilusad di pa lang dugay ang proyekto sa Kapisanan ng mga Brodkaster sa Pilipinas (KBP) Cebu nga gitawag og "Election Plugs."

Ubos sa maong proyekto, ang 39 ka mga sakop nga sibyaanan sa KBP dinhi sa Sugbu mopalanog sa maong mga plug kun minugbong pahinumdom sa mga botante sa angay nilang buhaton atol sa piniliay ning umaabot nga Mayo 14.

Si Cebu KBP chairman Edward Abad miangkon nga ang maong election plugs dili makapalimpyo sa hingpit sa piniliay apan suma pa niya basin na lang makatandog sa tanlag sa mga pumipili ug mismo sa mga kandidato.

Dako ang balor sa airtime nga gamiton sa mga sibyaanan alang sa election plugs apan wa nila kini igsapayan tungod kay mahinungdanon ang tumong niini.

Mipaluyo kami sa maong kalihukan sa KBP ug manghinaut usab kami nga makab-ut ang tumong ug tinguha niini.