Utang sa lending

Gikan sa cellphone number 0921-9941944: "Good day, Sir. Usa ako ka magbabasa sa imong lindog sa Banat News. Naa lang koy pakisayran. Naa koy utang sa usa ka lending. Gipadad-an kog letter of estafa daw nga unta nagbayad man ko. Duna gani koy resibo. Ang papel o sulat wala pa gyud isulod og sobre. Dili kaha ning ila pagpakaulaw nako sa akong gitrabahoan? Hapit na lang ko dili motrabaho." -- January 28, 2007--05:58:20)

Wala koy nakitang igong basehan aron pakaulawan ka sa lending company nga imong nautangan ngadto sa imong gitrabahoan, kana kun wala ka man gayod makahimog kalapasan. Ang maayo mong buhaton mao nga moadto ka sa buhatan sa lending company ug mangayo'g husay kalabot nianang sulat nga gipadala kanimo. Duna ka man kahay gihuptang resibo nga magmatuod nga nakabayad ka sa imong utang?

Dili man sab tingali magpataka og padalag notisya para sa estafa ang usa ka lending company kun walay igong basehanan. Sa imong kaso, basin gumikan sa kabalingag maong ikaw ang napadad-an basin alang sa lain unta kanang maong notisya. Mao nga ang mas maayo mong buhaton mao nga mopakita ka didto sa buhatan sa lending company ug makighusay kanila. Ipakita kanila ang resibo nga imong gihuptan.

* * *

Sa laing bahin: "Naay dili maayo diha sa LTO Mandaue. Ang plastic sa akong license wala pa gi-release gikan sa akong pag-renew, 10 months na karon. Ang uban dili man kaayo magdugay. Thanks." -- 0906-9234325 (Jan. 28, 2007--23:09:20)

Kadugay god! Tiaw bay 10 months na? Siyaro na man sab. Manghinaot ko nga inigkapatik niining imong text dinhi sa akong lindog na-release na ang imong plastic nga license. Maayo gani kay taas kag pailob kay nakaantos ka man paghinuwat nianang maong gidugayon. Pastilan!

Sigehi kanag follow-up sa buhatan sa LTO-Mandaue. Abi nimo, kanang uban diha nga dali rang makalusot ang ilang lisensiya, miagi kana sila sa mga fixer. Mao nay problema diha. Kun dili ka moagig fixer, dugay molusot ang imong transaksiyon. Pero bunalan sab kag dagkong kantidad nianang maong mga fixer.

* * *

(Sumbong ug reklamo? Text sa 0910-8105522)