Mga empleyadong nagbawon og computer

Daghang mga ahensya sa goberno ang gasalig sa suporta sa mga lokal nga pangagamhanan aron kini maka-alagad sa katawhan. Ang polis, piskaliya ug kabomberohan dili maka-serbisyo nga epektibo kon wala pay abag gikan sa mga LGU. Pananglitan, ang pulis kulang sa armas, gasolina, pagkaon ug sakyanan nga gamitonon kaayo sa ilang trabaho. Samtang ang mga piskal usab nagkinahanglan og plete ngadto sa mga lungsod og kahimanan sa opisina aron makahimo sa ilang trabaho.

Dili paigo ang logistical support gikan sa nasyonal nga opisina aron kining maong mga ahensya makatarong og serbisyo sa publiko. Karong bag-o, nakadungog kita sa usa ka bombero nga mipadayag nga gusto na lang siya moluwat sa katungdanan tungod sa iyang pagtuo nga nagpabaya ang mga kadagkoan sa mga panginahanglan sa ilang buhatan. Laliman ba kag ang ilang mga firetruck walay gasolina, kay dili sad mosugot ang ilang opisina nga tubilan og gasolina gikan sa nasyonal ang mga firetruck nga hinatag gikan sa lokal nga pangagamhanan. Apan unsaon man sad nga kon dili sila hatagan sa lokal og mga firetrucks, nga ang firetrucks gikan sa nasyonal magsige man lang sad kadaot unya pirmi lang dugay ang budget para sa pagpa-ayo? Sulod sa dugay nga panahon, mao kini ang reklamo: ang suporta sa mga ahensya gikan sa ilang departamento kulang kaayo. Walay sakyanan ang pulis, apan trabaho nila ang pagresponde sa krimen. Walay pamelite ang piskal, apan gikinahanglan sila moadto sa lain-laing lungsod matag adlaw.

Matud pa sa usa ka taga COA, kini kunong mga nasyonal nga opisina, gasigeg operate bisag walay operating funds. Tinuod baya kini. Lisud pagdumala ug pagpadagan sa usa ka opisina nga walay pundo. Apan baya dinhi sa atong nasud, mao kana ang sitwasyon. Ang hapit tanan nga nasyonal nga ahensya galihok bisan walay pundo. Kay ang tanang pundo tua man sa central office.

Pananglitan sa piskaliya, aduna kami baynte ka piskal ug sobra sa traynta ka mga staff. Kining mga empleyado diri kada adlaw sigeg type og kaso, gatosan ka kaso ang gibista matag adlaw. Matag motion ug affidavit gakinahanglan og hangtod napulo ka kopya. Hunahunaa na lang og pila ka libo ka bond paper ang gigamit niining maong opisina matag adlaw. Apan mutoo ba mo, nga sulod sa usa ka tuig, ang budget sa papel gikan sa nasyonal mokabat lamang og kwatro mil ka pesos. Sa tinuod lang, kanang bond paper nga balig P4,000 dili gani na kaabtag usa ka bulan.

Unya naa mi sakyanan nga gamiton alang sa pag-file sa mga kaso sa lain-laing mga dapit sa probinsya. Lupig pay Ceres kon hisgotan nato giunsa pagmalmal kining sobra na sa napulo ka tuig namong sakyanan. Puyra buyag sulod sa maong gidugayon, padayon nga gilibot niini ang mga lugar sa probinsya, bisan kon wala pay budget alang sa gasolina, walay budget sa ligid, sa aciete, sa pag-paayo, sa tanan.

Sa tibuok piskaliya, aduna lamay duha ka computer nga gihatag sa nasyonal nga opisina. Ang usa guba na, ang ikaduha mao pay pag-abot. Ang mga empleyado diri migamit sa ilang personal nga computer aron makahimo sa ilang trabaho.

Kining ubang kakulangan gihulipan kini sa mga lokal nga pangagamhanan o LGU. Ang mga munisipyo maoy naghatag sa lugar sa opisina sa mga lungsod ngadto sa bombero, sa ubang pulis, sa piskal ug uban pang nasyonal nga ahensya. Ang kuryente nga gigamit, ang ubang kahimanan gikan sa suporta sa LGU.

Dako ang kalabutan sa lokal nga pangagamhanan sa paglihok sa mga nasyonal nga ahensya. Kini tungod kay hinay ang lihok sa mga ahensya tungod sa burokrasiya, tungod sa pundo nga atua sa gitawag nga "imperial Manila". Pinaagi sa Local Government Code, ang mga LGU makabaton og bahin sa internal revenue allotment o IRA ug mao nga motabang usab sila sa nasyonal nga kalihokan. Tungod kay mao man kini ang sitwasyon dinhi sa ubos, angay lang sab tingali nga klarohon na lang ang katungdanan sa mga LGU sa paghatag og suporta sa mga ahensya sa goberno, ug nga dungagan na lang ang IRA sa mga lokal nga pangagamhanan alang sa maong gastohanan. Tingali mas maayo pa ang paglihok sa mga serbisyo sa goberno ngadto sa katawhan.

Alang sa inyong mga panahom ug reaksyon, palihug email sa [email protected] o text sa 0915-5536986. Daghang salamat.