Ang bansagon nga gidala

Niining bahina sa akong lindog, niay lahi nga sumbong nga akong hatagan og pagtagad. Sa sinugdan nakahunahuna kong isalindot lang kini kay dili na akong linya ang buot niyang pakisayran. Pero sa kabalaka nga magmahay siya nako, mihukom na lang gayod ako nga hatagan og luna ang iyang text dinhi sa akong lindog.

Ang iyang text nagkanayon: "Good day, Sir. Just call me Pisces of Busay. Naa lang koy ikonsulta bahin sa akong mga anak. Wa pa mi kasla sa akong kapuyo. Naa na miy duha ka anak ug iyang apelyido ang gidala sa mga bata. Gusto unta ko nga akong apelyido ang dad-on sa mga bata kon puyde. Di pa ko ready nga magpakasal sa akong kapuyo, okey ra man sab niya nga mag-live in lang mi. Unsay angay kong buhaton? Daghan kaayong salamat." -- 0922-5021431

Maayo unta kadto kon imo pang gibutyag kon ikaw ba ang lalaki o ang babaye aron mas direkta ug haom ang akong pagtubag. Hinuon, sa akong analysis sa imong text, dako gyud ang akong pagtuo nga ikaw maoy lalaki. Kana kun wala ko masayop.

Kun ugaling ikaw ang lalaki, puyde kang moadto sa buhatan sa Civil Registry ug pailisan ang apelyido sa imong mga anak kun gusto ka gayud nga ang imong bansagon maoy ilang dad-on. Mahimo na man kana karon bisan dili pa kamo kinasal nianang imong kapuyo kun maoy atong basehan ang gitawag nila og Revilla law.

Ang imong buhaton mao nga maghimo ka og pinanumpaang pamahayag nga naglatid nga imong giangkon ug giila nga imong mga anak ang mga anak sa imong kapuyo. I-submit ang maong pinanumpaang pamahayag ngadto sa Civil Registry ug pil-api (fill up) ang form nga ihatag sa registrar kanimo. Ingon niana lang kasayon. Nagtuo kong dili mountol ang proseso kay dili man kaha tutol sa imong plano ang imong kapuyo?

* * *

Daghang nag-text nako niadtong Pebrero 17 ug mipadayag nga nalipay sila kay gisikop sa taga NBI ang mga fixer sa NSO. Pero duna poy misaway kay samtang abtik silang mihimog lakang pagsikop sa mga fixer sa NSO pero wala sila makasikop sa mga fixer sa buhatan mismo sa NBI. Unsa diay? May fixer pod diay sa NBI? Ngano man? Dili ko motuo niini pero angay pod kining susihon. Basin walay kalibotan ang taga NBI niini kun tinuod man ugaling kini.

* * *

(Sumbong ug reklamo? Text sa 0910-8105522)