Walay eligibility

Niining bahina sa akong lindog, maoy una nakong hatagan og dalan aron makalusot kining text sa usa ka magbabasa nga nagkanayon: "Good day, Sir. Usa ko sa tigbasahan sa Modus. Naa lang koy gamay pangutana. Ang akong bana 10 years in service na pero tangtangonon siya karon sa trabaho kay wala siyay eligibility. May makuha kaha siyang benefits? Magpaabot ko sa imong tubag." -- 0918-630xxxx

Daghang salamat sa imong text. Matawag tang nagpasagad lang usab kining imong bana. Tiaw ba nga napulo na siya ka tuig sa serbisyo unya wala gayod siya maningkamot nga mahimong eligibible? Dili unta mosangko sa ingon niining panghitabo nga may pasidaan na nga matangtang siya sa trabaho kay wala siyay eligibility.

Hinuon, kun mahinayon man gayod ang pagkatangtang sa imong bana sa trabaho, posible nga makakuha siyag benepisyo pero nagdepende lang kana sa sirkumstansiya. Nga sa ato pa, 50-50 ang posibilidad. Akong tambag nga karon pa lang gani, mas maayong mangita na ang imong bana og alternatibong panginabuhian agig panagana kun ugaling mahinayon gayod ang pagkatangtang niya sa trabaho.

* * *

Sa laing bahin: "Good day, Sir. Nagtrabaho ko sa usa ka dakong kompaniya diri sa Mandaue karon. WS ang inisyal nga ngalan sa kompaniya. Dili mi hatagan og pay slip. Tulo na ko ka tuig nagtrabaho pero wala sad miy SSS diri." -- 0919-8662479 (January 23, 2007--20:31:54)

Wala man kaha ka magduda nga gikuwangan ang imong suweldo bisan wala ka hatagi og pay slip? Pero maayo gayod unta kadto kon adunay pay slip aron masumada kon pila ra gyod ang imong suweldo ug kon unsay mga deduction niini. Morag sakit na man gyod kini sa pipila ka kompaniya nga dili moisyu og pay slip.

Bahin sa SSS, puyde man nga ikaw na mismo ang magpahigayon og voluntary contribution kon gusto ka gayod nga makabaton og SSS. Puyde man gani nga magpatabang ka sa imong employer sa pagpahigayon niini. Total, ikaw man ang magbayad. Busa kon gusto ka gyod nga adunay SSS, voluntary contribution na lang. Unsaon nga nakatumong ka man og kompaniya nga wala maglantaw sa kabulahanan sa ilang mga trabahante.

(Sumbong ug reklamo? Text sa 0910-8105522)